MALAMULELE: Badudi ba befetšwe ka morago ga gore mokgalabje a hlokofatšwe ke
bašireletši (security guards). Se se tla ka morago ga gore mokgalabje yo a tlaišwe ka go
bethwa ka ge go thwe o hlapologile phatlalatša mabenkelengkgoparara a Masingita Crossing
Mall go la Malamulele.
Tiragalo ye e gatišitšwe moo go bonagalago yo mongwe wa bašireletši a hlasela mokgalabje
yo mme tiragalo ye e gogile šedi ya badudi bao ba befedišwago ke boitshwaro bja bašireletši
setšhabeng. Kgatišo yeo e laetša yo mongwe wa bašireletši a betha mokgalabe yoo ka ntahle
pele a mo tlogela.
Kgatišo ye e befedišitše bontši bja batho bao ba gananago le boitshwaro bja bašireletši. Ba
ipiletša gore ba rakwe mošomong ba be ba swarwe ka molato wa tlhokofatšo. Ba re ba
boifela maphelo a batšofadi ba bona ge ba le lefelong le. Tinyiko Ngobeni (39) o re batšofadi
ga se ba swanelwa go swarwa ka tsela yeo ya go ba nyenyefatša le go ba tlontlolla.
“Ga o dire bjalo go batšofadi. O swanetše go ba o na le pelo e mpe go hlokofatša motšofadi
ka tsela ye. Bašireletši bao ba ipaketše madimabe ka gore seo ba se dirilego go swana le ge
motho a roga badimo ka gore re dumela gore batšofadi ke badimo ba go ja magobe,” a realo.
Ba bangwe ba re ba lapa la mokgalabe yo ba swanetše go bula molato maphodiseng. “Molato
wa go betha o swanetše go bulwa kgahlanong le bašireletši bao. Motho yo a phatlaladitšego
kgatišo yeo o šomile ka gore ba lapa ba tla ba le bohlatse bja tiragalo ye. Ke boifa le go
tšofala ge e le gore re ile go swarwa ka mokgwa wo,” gwa realo Petrus Manganyi (43).
Bontši bja batho ba re ba sola tshepedišo ya go lefišwa ga dintlwana tša boithomelo
mabenkelengkgoparara mola wona mabenkele ao a rekiša dijo le dino. Na ge bath oba
swaregile ka lebaka la dijo le dino tšeo ba di rekilego gona fao, ba ikimolle kae? “Mokgalabje
yo o be a ka se hlokofatšwe ge nkabe dintlwana tša boithomelo di sa lefišwe,” gwa realo
modudi.
Morulaganyi (coordinator) wa Older Persons Forum, Happy Mogoboya, o re tiragalo ye e
kweša bohloko. “Re kgala tiragalo ye ka bogale mme re ipiletša go ba lapa gore ba tlaleye
tiragalo ye maphodiseng. Batšofadi ba swanetše go hlompšha ka dinako ka moka.” a realo.
Molaodimogolo wa dipapatšo (Senior Marketing Manager) go la Masingita Group of
Companies, Lebohang Matlala, o phatlaladitše sengwalwa ka Labobedi, 11 Dibokwane 2025
seo se laetšago gore ka tshepedišo ya ka gare, mošomi yoo a amegago o fegilwe mošomong
ge ba sa emetše dipoelo tša dinyakišišo tšeo di kgatlampanago.
“Masingita Group of Companies e ikeme go molao kgahlanong le tshotlo,” sa realo sengwala.
Mmoleledi wa maphodisa a Limpopo, Brigadier Hlulani Mashaba, o re ga ba na molato wo o
butšwego ke mokgalabje go fihla Nakong ye.
