GAMPHAHLELE, Mashite: Ka morago ga pula ya sefako le phefo ya matlakadibe tšeo di
amilego malapa ao a ka bago a 200 GaMphahlele ka tlase ga Masepala wa Selegae wa
Lepelle-Nkumpi. Yo mongwe wa badudi yo a lobilego ntlo le diphahla tša gagwe o filwe
madulo a lebakanyana.
Ka morago ga ketelo ya Molekgotlaphethiši wa Pušotirišano,Bodulo le Merero ya Setšo
(CoGHSTA), Mna Basikopo Makamu gammogo le sehlophatšhomo sa Taolo ya Masetlapelo,
sa Masepala wa Capricorn le Masepala wa Selegae wa Lepelle-Nkumpi. Ba ile ba
phethagatša tshepišo ya bona ya gore ba tla tlišetša ba lapa madulo a lebakanyana gore ba
kgone go bolokega ge ba sa le gare ba leka go ba lokišetša ntlo goba go ba agela ntlo.
Meladi Mphahlele o re: “Ke leboga ge ba kgonne go re direla mo re ka fihlago hlogo gona ka
gore ka kua phapošing yela re e pipilego ka tente, bana baka ba letše ba se ba robala ba
nagana gore tiragalo yela ya masetlapelo e tlo ipoeletša. Ke tshepa gore ba tla lala ba robetše
boroko ka mo mokhukhung wo ba re diretšego wona. Ke re okare mmušo o ka thuša le
malapa a mangwe le wona a kgone go fihla dihlogo,” a realo a laetša a lokologile gore o tla
robala boroko.
Ke leemaema motseng wa GaMphahlele, badudi ba topatopela ditena, masenke le tše dingwe
tšeo ba di lobilego e le ge ba leka go kgomasetša gore ba kgone go ba le mo ba ka robalago
gona le go boloka phahlo ya bona.
Ba Kgoro ya Tlhabollo ya Leago ba tsena malapeng ao a amegilego ba ngwadiša badudi gore
ba kgone go ba akaretša lenaneong la bona la go ba thuša. Eskom e lokišitše mohlagase efela
ka ge mathale a mangwe a kgaogile ga se badudi ka moka bao ba nago le mohlagase. Le ge
go le bjalo badudi ba bangwe ba sola Ekom ka go buša mohlagase mola mathale a mangwe a
kgaogile. Ba re ba tšhogela gore bana ba ka kgoma mathale a mohlagase ba gobala ka ge a na
le mollo.
