THOMO NKGADIMA
BURGERSFORT: Meyara wa Masepala wa FetakgomoTubatse, Cllr Eddie Maila, o abetše barutwana
ba lesomepedi (12) dipasari tša go ithuta ditheong tša go fapana tša Thuto ya Godimo mo Afrika
Borwa. Dipasari tše di akaretša go lefela dithuto, go reka ditlabakelo tša go ithuta, bodulo le tšhelete
ya thekgo ya kgwedi ka kgwedi (stipend). Tše ka moka di kgonagetše ka thekgo go tšwa Ofising ya
Meyara go thekga barutwana bao ba nago le maswanedi ba go tšwa malapeng a go diila.
“Ke rata go lebogiša barutwana ba kreiti 12 bao ba kgotsofaditšego dinyakwa tša gore ba fiwe
dipasari tše. Le ba mahlatse. Thuto ke bokamoso. Re adibetša ka matsogo a mabedi tsenatseno ye ya
masepala mme re hlohleletša lena barutwanaa go beya šedi go dithuto tša lena gore le tle le be badudi
ba bakaone ba boikarabelo ba setšhaba sa masepala. Dirang gore le šome ka maatla dithutong tša lena
gore batswadi ba lena, masepala le setšhaba sa wona ba kgone go ikgantšha ka lena. Re re mahlatse,
mahlogonolo le katlego go lena leetong la lena la dithuto,” Maila a realo ge a bolela.
Tše nkego go aba dipasari ga se gwa lekana, Bokgobapuku bja mabonwa bja Praktiseer bjo bo
thekgwago ke masepala wa Fetakgomo-Tubatse, bo fihlile go 95% go fetšwa go agwa. Mašeleng a go
lekana R15 milione a Kadimo ya go se lefelwe ya Mafarahlahla a Masepala (MIG) a dirišitšwe go
phethagatša projeke ye e bohlokwa ye.
Le ge Praktiseer e le lekheišene la kgale leo go lona go agilwego Kholetšhe ya Thuto e Kgolwane ya
Dr CN Phatudi, go fihla gabjale e be e se na bokgobapuku go tloga mengwageng ya kgale ya
apartheid. Ge bo phethilwe, bokgobapuku bjo bo letetšwe go tšweletša ditsebi le dikgoni tša
profešinale tšeo di tlago hola, esego go hula, setšhaba se sa Thulare. Bokgobapuku bjo bo lebeletšwe
go gogola bana go tšwa ka dithokgweng le mebileng fao ba lego kotsing ya go ba makgoba a dinotagi,
diokobatši le bosenyi, le go ba fahlela ka tsebo le bohlale tšeo di ka dirago gore ba kgone go eta pele,
go laetša lesedi le go hlahla, esego go hlahlathiša, šaba le la Thulare.
Tlhokego ya makgobapuku ke bjo bongwe bja dilo tšeo di dirago gore go ithuta, go kgoboketša le go
phatlatša tsebo e be morotoga go barutwana, baithuti le setšhaba ka kakaretšo. Setšhaba seo se balago,
ke setšhaba seo se nago le tsebo le tshedimošo gomme ka lebaka leo se matlafetšego. Tsebo le
tshedimošo, le ge go le bjalo, ga se dilo tšeo di rothago go tšwa marung – di nyaka makgobapuku gore
di be gona.
Nakong ya go agwa ga yona, projeke ye e hloletše batho ba masometharo (30) dikgoba tša mešomo ya
lebakanyana. Ge bokgobapuku bo feditšwe go agwa, go lebeletšwe gore bo tla bula dikgoba tša go
tsebalega tša mediro ya go ya go ile tša batho bao ba tla bago ba šoma fao.
