MOKANE MALATJI
POLOKWANE: Metšhene ya go kempola yeo e sego molaong ya palo ya go lekana 327 e
pšhatlagantšwe lefelongtsoko la go kgatla ditšhipi toropong ya Polokwane. Lesolo le la go pšhatla
metšhene le beakantšwe ke lekala la Limpopo Gambling Board (LGB) yeo e lego lekala la Kgoro ya
Tlhabollo ya Ekonomi, Tikologo le Boeti (LEDET) le Kgoro ya Maphodisa. Lesolo le le nepilwe go
fediša metšhene ya go diriša tšhelete yeo e sego molaong mo profenseng ka bophara.
Ngwageng wa go feta, lekala le kgonne go kgoboketša le go pšhatla metšhene ye 615 yeo e sego
molaong. Godimo ga metšhene yeo e kgatlilwego lenyaga, palo ya go lekana 329 kgobokeditšwe
kotareng ya go feta. Go bonagala selete sa Sekhukhune e le sona ketapele ka palo ya godimo ka
metšhene ye 102 yeo e hweditšwego mabenkeleng a fao.
Kernel Van Schalk Wyk, legatong la Kgoro ya Maphodisa o rile: “Re kgopela gore setšhaba se
thušane le rena ka go re tsebiša ka mafelo a dikgwebo a go ba le metšhene ya mohuta wo. Dikgwebo
tše ke tša digongwana tša go se be molaong tšeo di tšwelago pele go gwahlafatša ekonomi ya profense
ya rena. Re ngangile mešifa, re eme komana-madula-e-bapilwe go lwa ntwa ya letsogokgaoga
kgahlanong le dithaloko tša go kempola tšeo di sego molaong. Re beile leihlo le mabenkele a madila
ao a sa latelego molao ka gore re a tseba gore tše pedi tše ke monwana le lenala.”
Mna Elijah Tjiane, yo e lego modulasetulo wa (LGB), o hlalositše ka moo lenaneo le le laetšago
katlego le kgatelopele. Le ge go le bjalo, o bapeditše mošomo wa bona le go kgelolla meetse a lewatle
ka lelepolana la go ješa ngwana motepa. “Dikgwebo tše tša ka leswiswing tša metšhene ya go
kempola, di hlafiša le go gatakela kgatelopele ya dikgwebo tšeo di lego molaong tša metšhene ya go
kempola. Re a tseba gore re ka se kgone go thibela batho go diriša metšhene ye fela seo re se bolelago
ke gore batho a ba diriše metšhene yeo e lego molaong esego ye ya ka maswiswaneng,” Tjiane a realo.
Legatong la molekgotlaphethiši wa kgoro go boletše morena Joe Motene gomme yena o retile lesolo
le ka gore, “Kotlo ya kgolego ya maloko a digongwana tše gabjale ke dikgwedi tše tshelelago mola
mašeleng a kotlo e le feela R1500. Tše ke dikotlo tše bofefo kudu tšeo di sa tšhošego basenyi le gatee.
Ka gona, re šogana le molao o moswa woo ka wona dilo di yago go fetoga ka mokgwa wo
digongwana di tlogo itšhatšharela le go golola. Re kgonne go golela bengdikgwebo ba go lekana 59.
Godimo ga bona, palo ya go lekana 53 ke ya badudi ba go tšwa dinageng dišele. Melao ya rena e
hlephile kudu. Ka gona, re tlamegile go šoma ka thata go thatafatša maemo a molao,” gwa realo Mna
Joe Motene legatong la Molekgotlaphethiši.
“Re swanetše go katana ka lesolo la rena, kudu re lebeletše selete sa Sekhukhune seo e lego ketapele
ka dipalopalo,” gwa realo Mna Mokgase Makoko yo e lego Molaodiphethiš (Ceo) wa LGB.
