Kopano e swerwe diiri pele ga ge go iwa lefelong leo go kgobokeditšwego metšhene go la Ladanna. Ye ke metšhene yeo e thopilwego ke maphodisa mabenkeleng profenseng ka bophara. Nepokgolo e be e le go pšhatlaganya yona metšhene yeo ka morago ga kopano. Molekgotlaphethiši o be a felegeditšwe ke bašomi ba Kgoro ya gabo le baetapele ba lekala la kgoro la Limpopo Gambling Board, baemedi go tšwa go dikgwebo tša gambling go akaretšwa Meropa Casino, Thaba Moshate, Khoroni, V-Slots, Gold Rush, Hollywood Bets le tše dingwe.
Monama o laeditše ka tsela yeo go kempola go go sego molaong e lego tlhobaboroko go ekonomi ya profense le go tekatekiša tšhireletšego go badudi ka kakaretšo. Yena ge a bolela o rile:
“Seo se re tshwenyago kudu ke gore poelo (profit) ya yona tšhelete yeo e šomago le go kgoboketšwa ke dinokwane tše tša go khukhuna, e di thuša go bula dikgwebo tša go se be molaong. Mohlala ke tše tša go rekiša metsoko ye e sego molaong, diokobatši, meepo ye e sego molaong le go tšhabiša batho. Basenyi ba šomiša kgorwana ya mollwane wa rena ya Beit Bridge go tla mo nageng.”
Baemedi ka moka ba dikgwebo tša go kempola bao ba boletšego ka nako ya kopano ba boletše ka tlhobaelo le ditlhotlo tšeo ba kopanago le tšona ka lebaka la dikgwebo tša metšhene ya go be molaong.
Mna Lehlogonolo Mafokwane go tšwa Meropa Casino o rile: “Rena seo se re tshwenyago kudu ke gore dinokwane tše di re tšeela bathekgi ka ge batho ba go raloka metšhene ba fapogela go ya go raloka metšhene yona yeo ya go se be molaong. Batho bao ga ba se sa tla go rena. Babapadi ba metšhene bao ba yago mafelong a dinokwane ga ba tsebe menyetla ye mebotse yeo ba e tlogelago go rena mola ebile seo ba se kgethago e le tsela ya go se šireletšege.”
Metšhene ka kakaretšo yeo e kgobakeditšwego Limpopo Gambling Board ka tšhomišano le Kgoro ya Maphodisa e balelwa go lekana 771 go tloga mathomong a ngwaga wa 2023/24.
“Palo ye e nameletše go feta ya metšhene yeo e thopilwego ka ngwaga wa 2022/23 yeo e bego e le 477. Go tloga ka la 24 Diphalane (Oktoboro) 2023 go fihla bjale, bobedi maphodisa le lekala la Limpopo Gambling Board ba kgonne go thopa metšhene ya go lekana 295 gomme yona e hweditšwe mabenkeleng a badudi ba go tšwa dinagamabapi bao ba dulago le rena.”
Morago ga kopano metšhene ka moka e ile ya kgatlwa ya šala e le
maratha.
