MMEGI WA SEIPONE
POLOKWANE: “Lenaneo leo re le thakgolago semmušo mamohla ke la bohlano (5) la
Lenaneo leo le Katološitšwego la Mešomo ya Setšhaba (EPWP). Lenaneo le esale le hlongwa
ke Presitente Thabo Mbeki ka 2004 bjalo ka kimollo ya lebakanyana ka nepo ya go fokotša
mohlako ka malapeng ao a hlakago. Ka gona, ngwaga wo lenaneo le le feditše mengwaga ye
20 le le gona. Mo nakong ye, bjalo ka mmušo re ka se kgone go lahla EPWP ka gore ka ntle
le yona re ka se kgone go fihlelela dilo tše dingwe. Le batho ba bohlokwa kudu ka gore le re
thuša go fihlelela dilo tše dingwe tšeo re ka se kgonego go di fihlelela ntle le lena,” gwa realo
Tonakgolo, Dr Phophi Ramathuba ge a bolela le diketekete tša bašomi ba EPWP lepatlelong
la kgale la Peter Mokaba letšatšing la 11 Diphalane (Oktoboro) 2024.
“Nepokgolo ya rena ke go bona batho ba šoma mediro ya go ya go ile. Ba bangwe ba lena ba
fiwa tlhahlo ge le šoma mešomo yeo le e dirago. Ka go dira mešomo yeo, le humana
boitemogelo. Re šetše re kwane le dikgoro tšeo di fapanego gore ge mešomo ya go ya go ile e
phatlalatšwa dikgorong tša go fapana, go swanetše go lebelelwa bašomi ba EPWP pele. Re a
dumela gore dikgwedi tše tshelelago ke nako e nnyane … okare nkabe mešomo ya lena e eba
ya dikgwedi tše 12. Re ya go reka dikgerekgere tše dingwe gape go katološa lenaneo la
Laboraro la Dikgerekgere. Re duma gore ba bangwe ba lena ba thwalwe go mediro ya go ya
go ile bjalo ka baotledi le mešomo e mengwe. Go na le batho bao ba bilego karolo ya lenaneo
le gomme ka boitemogelo bjo ba bo humanego, ba kgonne go hloma dikgwebo tša bona fao
ba hloletšego ba bangwe mešomo. Seo ke seo re se thabelago re bile re se hlohleletšago.
“Go hlola dikgoba tša mešomo ke taba yeo e lego ntlhoraneng ya dinepo tša mmušo. Go
šoma go fa motho serithi ka lapeng le setšhabeng. Ge motho a šoma, o fa bana ba gagwe
kholofelo ya gore le ge ka nako go le boima, mafelelong a kgwedi go ba le phetogo. Go šoma
go fa motho lebaka le lebotse la go tsoga mesong. Mo Limpopo re lemogile gore ge batho ba
šoma, taba ya mathomo yeo ba e dirago ke go ikagela dintlo tša bona. Bjalo re a bona gore ge
re ka thuša go hlola dikgoba tša mešomo, re tla ba le batho ba bantši bao ba kgonago go
ikagela dintlo tša bona. Ge batho ba šoma, re ka se hlwe re re re ba gela dintlo … re ka šomiša
tšhelete ya gona go phetha merero e mengwe ya tlhabollo. Nepo ya rena ke go boetša serithi
go batho ka go hlola mešomo ya ruri. Go hlola mešomo ya ruri ke bokamoso bjo re
katanelago go bo fihlelela,” Ramathuba a realo ge a tšwela pele.
