“Bjalo ka Meropa Casino, re ratile Leeto la Polokwane. Re a le rata. Ka Leeto la Polokwane, re
bona dikgonagalo tše dintši tša kgolo ya Meropa bjalo ka lefelo la boipshino le boithabišo. Bjalo ka
ge le tseba, Meropa ke pelo ya boithabišo mo Polokwane. Meropa e bapala karolo e bohlokwa go
ekonomi ya Limpopo. Go tloga ka 2015 go fihla ka 2022, Meropa e tšhetše R1 222 059 006.43 (R1,
2 bilione) e le ya metšhelo. Gape khamphani ye e na le bašomi ba 580 ba dinako ka moka. Ntle le
gore bašomi ba rena ba tla holega ka Leeto la Polokwane, mathata a dinamelwa a baeng bao ba
felago ba re etela, a tla fokotšega. Re dumela gore tsela ya Leeto la Polokwane ya go tla mo Meropa
e tla goka banamedi ba bangwe ba baswa,” gwa realo Modulasetulo wa Boto ya Meropa Casino,
Mna Mashoro Mogodi, nakong ya ge a efa ditebogo moletlong wa go thakgola Karata ya Maeto ya
Leeto la Polokwane ka Mošupologo wa 26 Phupu (June) 2023 lefelong la Meropa Casino.
“Segwera sa Meropa le Leeto la Polokwane ga se sa molomo feela – magadi a thomile go tšwa.
Meropa le Leeto la Polokwane di iphile dikgwedi tše tshelelago go fihla mafelelong a ngwaga wo
go dira diteko tša dikgonagalo tša tsela ya Leeto la Polokwane go tla Meropa. Meropa e lahletše
R100 000 go ditiragalo tša go kwalakwatša tsela ye ya go tla Meropa ya Leeto la Polokwane ka go
fana ka dimonamonane. Meropa e ya go reka sebaka sa moya go setiši sa seyalemoya sa Energy FM
go kwalakwatša Tsela ya Leeto la Polokwane la go ya Meropa le go rekišwa ga Dikarata tša Maeto
tša Leeto la Polokwane. Meropa e ya go fana ka dikarata tše 50 tšeo di rwelego R200 ka go Karata
ya Maeto ya Leeto la Polokwane go Maloko ao a Hlomphegago Kudu (MVG) ao a nago le dikarata
tša Meropa. Go feta fao, Meropa e ya go fana ka dikarata tše 20 tša maeto tša Leeto la Polokwane
tšeo di khošego R200 nngwe le nngwe … o rata bjang?” Mogodi a realo
Go tiišetša gore tsela ya Leeto la Polokwane ya go ya Meropa e a butšwa, Meropa e beeleditše
R200 000 go ditlabakelo tša go bala dikarata tšeo di tlago lokelwa go dipase tše 26 tša Leeto la
Polokwane.
“Sefoka se segolo sa R10 000 se tla fiwa monamedi wa mahlatse wa tsela ya Leeto la Polokwane ya
go tla Meropa. Sefoka se se ka thopša ke wena goba wena … re sa lebale wena fao. R10 000 ye ke
ya go lefela ditshenyegelo tša maikhutšo ‘magodingwaneng’ a go swana le Suncity, The Maslow
Hotel kua Sandton, Time Square Casino go la Pitori goba Meropa Casino gabo ngwanana ‘a diroko
… go ya le gore na mothopasefoka o rata bjang,” Mogodi a realo.
Ge e le gore o be o beile Leeto la Polokwane leihlo ka kgopolo ya gore letšatši le lengwe o tla
lahlela la bošiwana, o bethile fase samma ka gore ‘…ngwana o tšerwe ke senatla…!’
