Modulasetulo wa mokgatlo wa ActionSA, Sello Lediga, o re Kgoro ye e bogale ka go aba dithentara
tša go sodiša ebile e hloka maikarabelo. Lediga o re ba lapišitšwe ke mathadinthako a Kgoro ye ka ge
e dula e le ditabeng ka merero ya go se be yona.
“Ga se kgale e be e le ka gare ga ditaba tša ditlabakelo tša go išhireletša (PPEs) ka morago ga go
amogelwa ga lengwalo la go itokolla mošomong ga hlogo ya Kgoro yoo a bego a nyakollwa go
dikgonagalo tša manyofonyofo a thentara ya didirišwa tša go itšhireletša ya go sodiša. Re ile go šala
taba ye morago go fihla re hwetša toka,” a realo.
Mokgatlo wa Democratic Alliance (DA) le wona o ngwaletše modulasetulo wa komiti ya maphelo go
lekgotlatheramelao la Limpopo, Simon Mathe, lengwalo la kgopelo ya kopano le Molekgotlaphethiši
Dr Phophi Ramathuba le hlogo ya Kgoro ya lebakanyana, Mutheiwana Dombo, gore ba tle le
dikarabo mabapi le thentara ya malahla gammogo le tshepedišo ya dinyakišišo mabapi le taba ye.
Mmoleledi wa DA mererong ya maphelo, Risham Maharaj, o re go kwagala gore Molekgotlaphethiši
Ramathuba o dumetše gore go na le dinyakišišo mabapi le thentara ye mme gwa kwagala gore hlogo
ya Kgoro ga e tsebe selo ka dinyakišišo.
Maharaj o re Kgoro ga sa ka ya bolela ka taba ya dinyakišišo goba mathata mabapi le thentara ye ya
malahla go komiti ya maphelo.
“Ramathuba gammogo le hlogo ya Kgoro ba swanetše go ema pele ga komiti ba re abele dintlla ka
moka mabapi le thentara ye, dinyakišišo gammogo le ditlamorago tšeo di tla aparelago bao ba
amegago,” a realo.
Mmoleledi wa kgoro ya Maphelo, Neil Shikwambana, o re tshepedišo ya go aba thentara ye ga se ya
phethagala ge taba ye e tsupologa.
“Ka fao, ga go na mošomo wo o dirilwego mabapi le thentara ye ebile ga go na mašeleng ao a
lefetšwego. Re iša šedi go seo taba ye e se dirilego go setšhaba ka morago ga gore ditokomane tša ka
gare di phatlalatšwe mme se se lekaleng la dinyakišišo,” a realo.
