Gabjale badudi ba dutše ka poifo ka ge tiragalo ya mohuta wo e le mathomo e direga motseng
wa bona. Ga go motho yo a tsebago gore ke mang a sentšego maswika a mme ba ipotšiša
gore ba ile go hwetša eng nakong yeo e tlago. Ba dumela gore bahu ba bona ba ka se robale
ka khutšo ka ge ba nyaditšwe.
“Maswika a segopotšo a bewa go hlompha bao ba re tlogetšego gore re se ba lebale. Bjale go
a tšhoša go bona batho ba šitiša bao ba ithobaletšego. Batho ga ba sa boifa gore ba tla
aparelwa ke leru le leso ka gore di ya ila go senya goba go utswa leswika la segopotšo
dirapeng,” gwa realo Agnes Masilo (36).
Ba bangwe ba badudi ba dumela gore maswika a segopotšo ao a sentšwe ke bašemane ba go
fola diokobatši. Se ke ka lebaka la gore bagononelwa bao ba tlogele goba go lebala lebotlelo
la senotagi le dieta.
Ba dumela gore bao ba ithobaletšego dirapeng tšeo ke bona ba dirilego gore bagononelwa
bao ba tlogele dilo tšeo gore ba kgone go nyakwa ka tšona.
Thabiso Maleka (29) o re go goleng ga gagwe o be a tseba dirapa e le lefelo le kotsi kudu leo
o ka se ralokelago go lona.
“Re a makala ge tiragalo ya mohuta wo e direga. Batho ga ba sa hlompha bahu mme bao ba
sentšego maswika ao ba swanetše go hwetša kotlo ye bohloko,” a realo.
Mmoleledi wa maphodisa, Colonel Malesela Ledwaba, o re ba nyakišiša tiragalo ya tshenyo
ya mabitla.
“Maswika a segopotšo a šupa a sentšwe mme ga go tsebje gore lebaka ke eng. Ga re tsebe
gore mogononelwa goba bagononelwa ke mang goba bomang ka se sebaka efela dinyakišišo
di tšwela pele,” gwa realo Ledwaba.
