Ba tswaletše mebila ka mollo le dikgerekgere, ba thibela tshepelo ya dinamelwa gammogo le
ekonomi ya toropo ya Tzaneen. Ye e be e le tsela ya go laetša go se kgotsofatšwe ke masepala
wa Greater Tzaneen ka ge ba re ga o theeletše dillo tša bona. Se ke ka morago ga gore ba
laetše dingongorego tša bona ka kgaotšo ya mohlagase yeo e amago ye mengwe ya metse
gammogo le tlhokego ya meetse.
“Re na le kgaotšo ya mohlagase mesong le bošego letsatši ka letšatši le ge e le gore kgaotšo
ya mohlagase e fegilwe naga ka bophara. Ke kgale re ngongorega efela go sa direge selo. Sa
go re befediša le go feta ke gore metse ye mengwe e hwetša mohlagase bošego le msegare
mola rena re hlaka,” gwa realo Jeanette Ratsoma (49).
Ba bangwe ba re ba kgona go fetša dibeke ntle le meetse. “Re gapeletšega go reka go bao ba
rekišago meetse mme bao ba hlakago ba swanelwa ke go ya dinokeng moo ba a hlakanelago
le diphoofolo. Re beya maphelo a rena kotsing ka gore masepala o a palelwa,” gwa realo
Joseph Maolwe (31).
Matome Rampya (44) o re ba ile go tšwela pele ka mogwanto, ba šitiša ekonomi ya toropo ya
Tzaneen go fihla masepala o theeletša dillo tša bona.
“Polelo yeo masepala o e kwišišago ke mogwanto ka gore ke kgale re ngongorega efela go se
na seo se diregago. Bjale ba tla ela dillo tša rena tlhoko. Re nyaka ditirelo,” a realo ka pefelo.
Mmoleledi wa masepala wa Greater Tzaneen, Neville Ndlala, o re ba amogela matshwenyego
a badudi mme ba ikemišeditše go šoma ka thata le batšeakarolo ba bangwe, go akaretšwa
Eskom le masepala wa selete sa Mopani go hwetša ditharollo.
“Efela, re hlohleletša badudi gore ba šomiše ditshepedišo tša maleba ka khutšo gore go se be
le ditšhitišo tšeo di ka amago gampe dikgwebo, dikolo le tše dingwe tša ditirelo,” gwa
kgopela bjalo Ndlala.
