Mmoleledi wa masepala Matshidiso Mothapo o re baotledi le batšeya karolo ba tsebišwa gore khamphane yeo e be go e lefiša baotledi legatong la masepala e abetšwe taelo go tšwa kgorong ya tsheko yeo e ba emišago go tšwela pele go lefiša baotledi.
“Taelo yeo e ganetša khamphane yeo goba bašomi ba yona go tšwela pele go šoma, go laola mafelo a go beya difatanaga le go lefiša baotledi toropong kgolo ya Polokwane,” arealo.
Mothapo o re baotledi ba eletšwa go se lefelele o mongwe le o mongwe wa khamphane ye mašeleng a go beya difatanaga.
Se se tlišitše lethabo go baotledi ka ge ba be ba gapeletšega go lefela R8 ka iri. “Bjale re ile go beya difatanaga tša rena re lokologile. Nagana fela gore ge o ka ema motsotso o tee gore o tšeye se sengwe, o gapeletšega go lefela R8. E be e le botlatla fela go tloga mathomong,” gwa realo Gladwin Mofokeng (36).
Ba bangwe ba re ba thabišwa ke gore kontraka e kgaotšwe ba e sa kolota mašeleng. Mootledi wa mengwaga ye 50 o re o kolota khamphane ye R500.
“Ke be ke lefela R72 ka iri tše seswai mme mašeleng a a dira R1 440 ka ngwedi. Nako le nako ge ke beya sefatanaga sa ka, ke be ke boifa gore ke ile go hwetša bahlapetše ba tsela ba se gogile. Gona bjale ke lokologile mme ke rapela gore kontraka ye e se boye gape,” a realo.
Le ge e le gore baotledi ba thakgetše, ba bangwe ba nyamišwa ke gore bašomi bao ba bego ba lefiša baotledi ba lahlegetšwe ke mešomo.
“Ga re rate taba ya go lefela go beya difatanaga, efela goa nyamiša gore bana ba batho ba lahlegetšwe ke mešomo mme ba ile go palelwa ke hlokomela malapa a bona,” gwa realo madala Josias Hlungwane (63).
Lenaneo le la go lefiša baotledi le thomile ka kgwedi ya Dibatsela 2019, mme la befediša baotledi bao ba bego ba itshepetše go beya difatanaga tša bona letšatši ka moka ntle le tefišo.
