SESHEGO: Badudi ba Seshego ka ntle ga Polokwane ba thabile ka ge lefelo la šušumela la
Juju Valley le ile go hlabollwa. Se ke ka morago ga gore badudi ba šušumele nageng yeo e
nago le mong ka kgang mme ba thoma go hloma mokhukhu mengwageng ye lesome ya go
feta ka ge ba lapišitšwe ke go pitlagana ka malapeng a batswadi ba bona.
Šušumela ye e thomile ka morago ga gore maloko a mokgatlo wa Economic Freedom
Fighters (EFF) a latele boipiletšo bja moetapele wa bona, Julius Malema, nakong ya ge a ba
laela gore ba šušumele le go šomiša naga yeo e sa šomišwego.
Maitekelo a dirilwe go tloša badudi nageng yeo efela gwa pala ka ge ba be ba ganelela.
Gabjale badudi ba thabile kudu ka ge ba ile go thoma go dula ba lokologile. Se ke ka morago
ga gore masepala wa Polokwane o netefatše gore o ile go boledišana le bengnaga ka nepo ya
go reka naga ye. Se se diregile kopanong ya lekgotla (khansele) ka Laboraro la 26
Dibokwane 2025.
Meyaraphethiši wa Masepala wa Polokwane, Cllr Makoro Mpe, o re ba tšere sephetho sa go
boledišana le bengnaga gore ba kgone go reka naga yeo.
“Le ge re ikemišeditše go hwetša tharollo ya maleba ya bodulo, re kgala ka bogale ditiragalo
tša go šušumela nageng ntle le molao. Re hlohleletša badudi gore ba dire dilo ka molao ka
gore tša go šušumela di ka se amogelege. Bao ba šušumelago nageng ka kgang, ba ile go
lebana le ditlamorago tša semolao,” a realo.
Mpe o re nepo ke go kopanya badudi ka moka ka gare ga ekonomi le ditirelo tša Polokwane
ka nako yeo ba latelago melao ya tlhabollo ya motsesetoropo. Badudi ba re ba lokologile ka
ge ba be ba dula ka poifo ya gore ba ka tlošwa nageng yeo. Agness Ngwepe (39) o re ke
kgale ba letile tsebišo ye.
“Ke be ke nagana gore ke ile go hlokofala ke se na lapa leo ke rego ke la ka. Ke thabile gore
Juju Valley e ile go hlabollwa ka gore se e be e le tumo ya ka,” a realo ka kimologo.
Ba bangwe ba re ba thabišwa ke gore tlhabollo ye e ra gore ba ile go hwetša ditirelo tša go
swana le dintlo tša RDP, meetse, ditsela, mohlagase le tše dingwe.
“Masepala o tšere sephetho sa maleba. Ke kgale re hlaka, bjale re thabišwa ke gore mohlako
wa rena o kgauswi le go fela. Re rapela gore masepala o kgone go reka naga ye ka gore ba
bangwe ba rena re nyaka go thoma go aga,” gwa realo Simon Tshukudu (45).
