MAMOGUDI MATEMANE
PRAKTISEER: Naga ya gešo e ikgantšha ka tokologo ya yona ya go swana e nnoši. Ya hwetša sekgwari, Mokgalabje mohu Mandela, a e tshediša legora la terata, a e tsenya bathong. Batho ba ikgogomoša ka tokologo ya dipolitiki le ge yona e fo ba go tšhela batho phoori mahlong. Ke tokologo mang ya go hloka kgotlelelano ya dipolitiki? Ke tokologo mang ya babuši ba maaka le magetla? E lego ke tokologo mang ya babuši ba mahodu? Ke ka lebaka leo dilo di fogo senyega re di lebeletše! Ke ka lebaka leo naga ye e fogo bola le go hlagala re e lebeletše. Polelo ye ya rena le yona e tsenetšwe ke seboko bjalo ka ntsho. Senokwana se sengwe le se sengwe sa yona, se bodile. Ge e le ga ntsho, e bodile go thoma ka modu go fihla ka lenono.
Mantšu le ditlwaelo tša segagešo di a iletšwa mo diradiong le dithelebišeneng. Le go ngwalwa ga se tša dumelelwa go ka ngwalwa. Go tsene mogofe mo bathong, mogofe wa go gwahlafatša le go fetola maemo a polelo ya rena. Mo ke šupa polelo ya Sepedi ka ge e le yona ke e bolelago, ke e amulego beleng. A ke fe mehlala e se mekae.
Mogofe wo ke o bolelago, wo o re senyetšago polelo, o re re se sa re sefofu ke sefofu. Re se sa re motho yo a golofetšego ke segole. Semuma le sona re se sa re ke semuma. Ge o re motho ke sefowa, le gona ba re o a mo roga. Mogofe wo wa go kgotlela le go fefola polelo ya rena, o tloga o thekgwa ke banna le basadi, le gona ba go ‘rutega’. Ba fora batho ba re ge o thoma lentšu ka “s”, ke go re o nyatša motho yoo. Ke go tloga neng? Ga se lenyatšo goba leepo, aowa, – ke go laetša seemo seo motho a lego sona. Seo se ntlabago ke gore go thwe go rogana maleme a a rena feela! Na maleme a ba bašweu wona ga a na le diphetogo?
Diema tša rena tša go swana le tšeo di latelago, re iletšwa go di šomiša ka ge ba re ke mahlapa. Tše dingwe tša tšona šedi:
- Kgomo ga e nye boloko ka moka
- Ya gola e raga lekgeswa
- Go nya ka legano (Se ke seka)
Ge re iletšwa go di ngwala, di tlile go huba, ka go realo, polelo ya diila e eya pele.
Le rena ka moka ga re šetše. Ge re gahlane le bao ba sa tsebego polelo ye, ba e šaetša, le rena re a ba thekga, ra e šaetša bjalo ka bona. Mehlala še:
- “Moagelani” bakeng sa “Moagišane”
- “Malome wa gagwe” bakeng sa “Malomeagwe”
“Komana madula a bapile”. Ya nnete ke “komana madula e bapilwe gobane mohla wa dira ga o tsebje”.
