“Bontši bja rena re be re palelwa sekolong ka ge re be re sa kgone go reka data go dira mešomo ya sekolo. Go tloga gabjale re ile go kgona go dira mešomo ya rena ya sekolo ka malapeng a rena,” gwa realo Christina Sebela (19).
Ephraim Motimele (33) o re ba be ba palelwa ke go nyakana le menyetla ya mešomo. “Ga re sa ile go hlaka ge re nyakana le mešomo mafarahlahleng gammogo le go romela mananeophelo a rena, ka fao re thakgetše kudu,” a realo.
Motlatšapresitente Mashatile o re projeke ye e nepile go se tlogele badudi morago ka ge tša titšithale di golela godimo.
“Bana ba rena ba itshepetše go inthanete. Ka fao, projeke ye e ile go thuša go godiša sekgoba sa titšithale ka go abela badudi inthanete,” a realo.
O re gabjale baswa ba Modimolle ba ile go kgona go nyakana le mešomo le go matlafatša menyetla ya kgolo ya dikgwebo tša bona.
“Ngwaga wo wa mašeleng, re tla be re kgokagantše malapa a go feta 700 000 mme ra kgokaganya a go feta 5 millione mo mengwageng ye mehlano ye e tlago. Se bohlokwa ke gore ga re ile go kgokaganya ditoropo feela, re ile go kgokaganya le metsemagae ka gore bontši bja bona ba palelwa ke go reka data,” Mashatile a realo.
Tona ya Dikgokaganyo, Titšithale le Theknolotši, Mondli Gungubele, o re projeke ye e arogantšwe ka diripa tše tharo tšeo di tlago go kgokagantšha meago ya setšhaba go swana le dikolo, tša maphelo le meago e mengwe ya mmušo.
“Se se ile go matlafatša ekonomi ya metsemagae le dikgwebopotlana,”
gwa realo Gungubele.
