Kereke ya African Methodist Episcopal go la Seshego, Zone 1 e hlasetšwe gararo lebakeng la
dikgwedi tše pedi. Mahodu a hlasetše kereke ye ka la 27 le 28 Phupu (June) 2023 mme a utswa
‘pressure pump’ le diphaephe.
Ge kereke e be e sa leka go tsoga go tšwa go bohodu bjoo, mahodu a boile gape ka Sontaga sa 9
Mosegamanye (Julae) a utswa dibjana (cutlery), setofo sa gase, mabotlelo a mabedi a gase le ‘pressure
pump’ tšeo ka moka di dirago R45 000.
Moruti Allen Sefora o re mahodu a robile lebati la tšhipi gore a kgone go tsena ka diofiseng tša
kereke.
“Mahodu a tla ka nako ya magareng ga 1 le 3 ya masa mme ga go yo a kwelego goba a bonego selo.
Mahodu a a tseba moo didirišwa di lego gona, okare ke ge yo mongwe a a boditše,” a realo ka
manyami.
O re ga se mathomo mahodu a hlasela kereke ye. “Mahodu a tsene ngwaga wa go feta ka sehla sa
marega, a utswa diaparo, dibjana le mmino. Mahodu a ga a sa tšhaba mafelo a Modimo,” a realo ka go
se kgolwe.
Sefora o boditše Seipone gore didirišwa tšeo di utswitšwego di rekilwe ke maloko a kereke. O re
bohodu bjo bo ba bušeditše morago mme go ile go ba boima go reka didirišwa tšeo gape. O re gabjale
badudi ba mathateng.
“Re be re dumelela badudi gore ba kgelele meetse mo kerekeng ge ba se nawo efela gonabjale ba
mathateng ka gore re utsweditšwe ‘pressure pump’,”
“Bana ba sekolo le bona ba be ba etla go ja dijo ge sekolo se tšwele efela gabjale re palelwa ke go ba
apeela ka ge re utsweditšwe setofo sa gase le mapotlelo a gase. Mahodu ga se a utswetše rena feela – a
utsweditše le setšhaba,” a realo.
Presitente wa Women Missionary Society ka kerekeng, Mpelege Monyai, o ipiletša go bao ba ka bago
le tshedimošo mabapi le mahodu ao a utswitšego gore ba tsebiše maphodisa.
Mmoleledi wa maphodisa, Colonel Malesela Ledwaba, o re ba nyakišiša molato wa go senya ka
kerekeng ye. “Ga se re golege motho efela re gare re a nyakišiša,” a realo.
