Se ke ka lebaka la gore Mosehla o kgonne go fetša go kitima ka nako ya diiri tše senyane,
metsotso ye masomepeditshela le metsotswana ye lesome (9:26:10). Ka go dira bjaloo robile
kelo (rekhoto) ya mengwaga ye 34 yeo e beilwego ke Wally Hayward yo a feditšego go
kitima ka nako ya diri tše lesome, metsotso ye masomehlanoseswai le metsotswana ye meraro
(10:58:03) ka ngwaga wa 1989 a na le mengwaga ye 80.
Badudi le bašomi ba mmušo ba kgobokane go keteka le Mosehla. Mathabatha o re ba
lebogiša Mosehla ka katlego ya gagwe.
“Bjalo ka mmušo, re ikgantšha ka Mosehla ka go beya Limpopo mmepeng. Ga re mo go mo
abela dimpho efela re mo go tseba mokgalabje yo a dirilego mohlolo. O thomie go kitima
mme a hlakana le ditlhotlo efela a kgotlelela go fihla mafelelong. Ye ke katlego e kgolo, kudu
ge re lebeletše mengwaga ya gagwe,” a realo.
Mathabatha o re ba ile go rulaganya letšatši leo ba tlago go abela Mosehla dimpho le go
keteka katlego ya gagwe semmušo. Mosehla o re leeto la gagwe la go kitima le thomile ka
1963. O hlakane le diteko tša go fapana efela a tšwela pele ka ge e be e le toro ya gagwe go
roba (rekhoto) ya go ba yo mogolo wa go kitima Comrades Marathon.
Toro ya gagwe ya bokamoso ke go roba (rekhoto) yeo e beilwego ke yena ngwaga wo o tlago
wa 2024. O re go be go se bonolo efela o a iteboga ge a ile a kgotlelela.
“Ke tšwa kgole le ditaba tše tša mabelo. Ba lapa le setšhaba ba mpha thekgo le tlhohleletšo
go modiro wo wa go kitima. Ka gona, ga ke sa kitimela nna feela eupša ke kitimela bana
baka, motse wa gešo, selete le profense ya gešo. Ke itokišitše nako e telele pele ga Comrade
Marathon mme ke be ke kgona go kitima sebaka sa 32 km gore mmele o tlwaele go kitima le
go aga kgotlelelo, ” a realo.
O re ke katlego e kgolo go yena go roba kelo (rekhoto) ya Hayward.
“Leina la ka le tla ngwalwa ka gare ga dipuku tša histori ya mabelo. Wo ke Comrades
Mararthon wa bolesome wo ke o kitimilego,” a realo.
O re mmele wa gagwe o tiile ka gore o ja dijo tša go fepa mmele tša setšo go swana le
merogo. Kgomotso Mphela (40) o re ba ikgantšha ka Mosehla.
