MMEGI WA SEIPONE
POLOKWANE: “Re thabišwa ke maikemišetšo a mmušo a go nyaka go rerišana le rena bjalo
ka magoši ka gore go na le ditaba tšeo re sa kgotsofalego ka tšona. Ye nngwe ya ditaba tšeo
di sa re thabišego ke taba ya polao ya magoši. Go šetše go bolailwe magoši a 49 mo nageng
fela ga go na tšwelopele mo melatong ya bona. Magoši a nyaka tšhireletšo e kaone. Taba e
nngwe yeo e re hlobaetšago ke taba ya naga. Ke kgale go bolelwa gore dinaga di tla bewa ka
tlase ga taolo ya magoši fela morero wo o sepela ka go nanya kudu,” gwa realo
Motlatšamodulasetulo wa Ntlo ya Bosetšhaba ya Baetapele ba Setšo le ba Khoi-San, Nkosi
Langa Mavuso, nakong ya ge a bolela kopanong ya Magoši le Motlatšapresitente, Shipokosa
Mashatile, hotelengtsoko ka ntlenyana ga Polokwane ka Labohlano la 12 Phupu 2026.
Nkosi Mavuso o llile gape ka dinaga tšeo di boetšwago dihlopha tše dingwe tša badudi tšeo di
laolwago ke ‘Communal Property Associations goba CPAs’. Tlhotlo ke gore na magoši a
swanetše go amega bjang go dinaga tše bjalo fao beng ba tšona ba bonago di swanetše go
laolwa ke bona ka ntle le kamego ya magoši fela ge ba na le mathata, ba llela go magoši.
Gape go na le bothata bja magoši a mangwe ao a sego maemong a tshwanelo …magoši ao
maemo a wona a sego a hlaka gabotse. Go tšeya nako e telele go rarolla mathata a magoši ao.
“Magoši a tshwenywa ke go bona dipeeletšo tša tlhabologo di dirwa mafelong a ditoropong
mola go se na dipeeletšo tšeo di dirwago mafelong a magaeng. Mmušo o swanetše go beya
pele taba ya go tliša dipeeletšo tša tlhabollo mafelong a dinagamagae. Taba e nngwe yeo e
tshwenyago magoši ke meepo yeo e sego molaong ditikologong tša wona, go utswiwa ga
leruo, dikgaruru tšeo di ithekgileng ka bong le bafaladi ba go hloka mangwalo a maleba.
Ditšhaba tše dintši di ikhwetša di se tša bolokega ka lebaka la bafaladi ba bantši ba go hloka
mangwalo a maleba. Magoši a tshwenywa gape ke go nanya ga phethagatšo ya molao
(Handbook) wo o amago mediro le boikarabelo bja magoši yeo magoši a ka kgonago go
itseparela ka yona ge a phethagatša mešomo ya wona. Magoši a thomile go fela pelo ka gore
mmušo o diega go phethagatša dinyakwa tša wona. Go šetše go fetile mengwaga ya go feta
30 mola mmušo wa temokrasi o tsenago tirišong eupša karolo yeo e swanetšego go kgathwa
ke magoši, le bjale ga e bonale ka botlalo,” Nkosi Mavuso a realo ka go ngongorega.
Kopano ye e be e tsenetšwe ke dikemedi tša magoši go tšwa dileteng ka moka tše hlano tša
profense, dikemedi tša mekgatlo ya magoši ya Congress of Traditional Leaders (Contralesa)
le Royal Leaders of South Africa (Rolesa), balekgotlaphethiši gammogo le balaodibagolo ba
mmušo.
