POLOKWANE; Khamphane ya difatanaga ya Jaguar e hlwele e swere lesolo la yona la go ralala
le mebila ka difatanaga tša yona mo toropong ya Polokwane. Lesolo le le hlomilwe ka nepo ya
go thuša dikgwebopotlana le mabenkele a magaeng le a makheišeneng ao a fokolago le ao a
šetšego a phuhlame go boela maemong a bophelo. Khampane ye e lebeletše go thuša dikgwebo
tša palo ya go lekana 1500 mo profenseng.
Mna Joseph Mashita, yo e lego Modulasetulo wa bosetšhaba wa khamphani ye o re: “Lesolo le le nepilwe
go tsošološa dikgwebo tša makheišeneng le tša dinagamagae, go emiša ka maoto le go matlafatša
borakgwebopotlana le dikoporasi ka go kaonafatša ditiro tša bohlolakgwebo (entrepreneurship)
le go šušumetša kgolo ya ekonomi. Lesolo le le nepilwe go matlafatša ditšhaba, go fokotša
tlhokego ya tekatekano le go theoša dipalopalo tša go hloka mediro. Gape lesolo le nepilwe go
ba le seabe go boiketlo le tlhabollo ya ditšhaba tšeo peleng di bego di gateletšwe, kudu
makheišeneng le ditikologong tša dinagamagae tša Aforika Borwa.
“Seo se dirgo gore lesolo le le be le maatlakgogedi, e be la nako ya maleba, le kgone go tšwetšwa
pele le katlego ya lona e kgonagale go elwa, ke ka gobane le ithekgile ka tlhabollo ya kgwebo le
kabo ya ditirelo. Lesolo le ithekgile ka go nyaka go aga dikgwebo tše 1 500 tšeo di lego gona le
tšeo di lekago go tsoga, dikgwebopotlana tšeo di gogago ka kgara, dikoporasi le mabenkele a
dispaza gammogo le dikgwebo tšeo di šetšego di phuhlame tšeo re tlago di rapa. Re ya go
alamela dikgwebo tše, ka go di beya ka tlase ga taolo ya dikgwebo tša go di feta lebaka la
dikgwedi tše lesomepedi (12). 30% ya thekgo ya rena e akaretša go ruta borakgwebo ka sekolong
go ba fahlela ka tsebo ya tshepetšo le taolo ya kgwebo mola 70% e le ya go dira mediro ya
kgwebo thwii fao baithuti ba tlago ba le benggae ba go ba feta ka tsebo ba dikgwebo tša go
swana le tša bona bao ba tlago ba ruta tša tshepetšo le taolo ya dikgwebo. Tlhahlo ye e akaretša
taolo ya kgwebo, go godiša le go katološa kgwebo gore ge nako ya go alamelwa e fela, ba be ba
tseba gore na dikgwebo di sepetšwa bjang,” gwa realo Mashita ge a hlalosa ka go naba.
Mashita, ge a tšwela pele, o laeditše gore go fihlelela pono ya bona, Lesolo la Tsošološo le
Matlafatšo ya Dikgwebopotlana tša Makheišeneng le tša Dinagamagae le hlomile metheo yeo e
tlago dirišwa go ela phihlelelo goba go palelwa ke go fihlelela dinepo le maikemišetšo tšeo di
boletšwego tša lesolo. Dinepo le maikešetšo a lesolo le di akaretša Phafogelo ya Bohlolakgwebo
(Entrepreneurship Awareness), Tlhabollo le Thekgo, Mananeo a Tlhahlo ka Tlhomo ya
Dikgwebo tše Diswa, Thekgo ya Tlhabollo ya Kgwebo, Go Humana Mašeleng a go Hloma
Kgwebo, Methopo ya Thekgo ya Mašeleng, bjalobjalo.
“Lesolo le le nagana gore kgwebo ya ‘Mabenkele a Dispaza’, ke kgopolo ya kgwebo yeo e
tšwago le go thoma mo Aforika Borwa … ke kgopolo ya rena. Re nyaka gore ditšhaba tša
gaborena di eme ka maoto le go tšeya gape taolo ya kgwebo ye ya wona – Mabenkele a Dispaza!
Ditšhaba tša gaborena – esego batho ba bangwe – di swanetše go tšeya taolo ya ekonomi ya
makheišene le ya dinagamagae. Re na le maano a go thuša ditšhaba go thoma, go laola le go
godiša dikgwebo tša tšona tša Mabenkele a Dispaza ka dikokwane tšeo re di boletšego,” Mashita
a realo ge a ruma.
