Ba babedi ba ba kopane ka 1994 ba le sekolong sa godimo motseng wa GaSekgopo ka ntle ga Modjadjiskloof mme ba thoma go ratana le ge meloko ya bona a lekile go ba kgaogantšha. Se ke ka lebaka la gore meloko ya Julia e be a sa nyake go kgaogana le yena ka ge e le ngwana a le tee mme se se hlotše go se kwane magareng ga malapa a bona.
Timothy le Julia ba ile ba lwela lerato la bona go fihla ge malapa a bona a thoma ka ditherišano tša magadi ka 2009. “Ba feditše beke ka mora ba rerišana ntle le go fihlelela kwano,” gwa realo Timothy.
Meloko ya Julia e ile ya feleletša e dumetše magadi. “Lerato la rena le tia letšatši ka letšatši mme lenyalong la rena le šegofaditšwe ka masogana a mabedi, Fernando (26) le Junior (12),” gwa realo Julia.
Timothy o re ba fetile ka gare ga diteko tša mehuta. “Batho ba lekile go re kgaogantšha efela ra tšwela pele go ratana. Ba be ba sa tsebe gore maitekelo a bona a go leka go re kgaogantšha a be a dira gore lerato la rena le gole le go feta. Ga go na seo se ka re kgaogantšhang,” a realo.
Go keteka lerato la bona la mengwaga ye 30, Timothy o hlabišitše mogatšagwe ka moya lebenkelengtsoko la mabonwa la go jela dijo.
“Ke mo išitše dijong go keteka lerato la rena ka tsela ya go ikgetha. Ke ile ka rulaganya se sengwe gape lefelong la go robala go dira gore moketeko wa rena e be wo o kgethegilego le gore le yena a ikwe a kgethegile,” a realo.
Julia o boditše Seipone gore ba nyaka go šupetša batho gore go na le baratani bao ba ka hlakago mmogo mme ba se fetogelane ge dilo di thoma go sepela gabotse.
“Ge o dumela gore molekane o ile go ba wa gago goyagoile, go ile go ba bjalo. Re agile lapa le borutho mmogo mme diteko ka moka tšeo re kopanego le tšona di dirile gore lerato la rena le tie. Lerato ga se mašeleng feela ka gore le ge re be re se na selo, re be re thekgana re sa tsebe gore letšatši le lengwe Modimo o ile go re hlogonolofatša,” ba realo.
