“Ge o ithuta leleme le leswa, o humana moya o moswa … o ba motho yo moswa. Bjalo ka Movenda, ge ke ithuta Sesotho sa Leboa / Sepedi goba Xitsonga, ke ba motho yo moswa … Mosotho wa Leboa goba Motsonga … motho yo a bolelago leleme le leswa. Ge leleme le ehwa, ga se leleme feela leo le hwago eupša le setšo seo se rwelwego ke leleme leo se a hwa. Maleme a a re tlemaganya, a dira gore re ipone bjalo ka malapa goba setšhaba. Maleme a rena a Aforika a kotsing ya go hwelela gomme ge re ka se eme ka maoto go šireletša maleme a a rena, a tla hwa!
“Ke fela ke botšiša diyunibesithi gore na ge thuto ya Temo (Agriculture) e ka rutwa ka Tshivenda, na ditamati tšeo di rutwago ka Tshivenda di tla gana go mela? Na ge tsebo ya Leratadima le Boso e ka abja ka leleme la Xitsonga, na letšatši le tla gana go hlaba goba pula ya gana go na? Na ge thuto ya Akhaonting e ka rutwa ka Sesotho sa Leboa / Sepedi, na ditšhelete di tla gana go hlakanya, go ntšha, go atiša goba go arola ka gore di rutwa ka leleme leo? Ke re go diyunibesithi ke re na le ya go ruta baithuti ba rena neng ka maleme a bona gore ba kwešiše dithuto bokaone? Tshivenda sa ka ke boikgantšho bja ka! Ke rata leleme le ebile ke ikgantšha ka lona. Gohle fao ke lego gona lefaseng ka nako efe goba efe, ke Movenda. Ke Movenda ge ke tsogile mme le ge ke robetše ke sale Movenda,” ka boitshepo le boikgantšho Nengovhela a realo.
“Ba re maleme a rena ga a na tšhelete – maaka feela! Maleme a rena a na le tšhelete! Wena ngwala ditaba tša go kgahliša tša go ba le maatlakgogedi ka maleme a rena … o tla bona gore batho ba di thabela bjang.Go ngwala ditaba le dipuku ka maleme a rena ke mokgwa o mokaone wa go boloka bohwa bja rena. A re ngwaleng dikanegelo tša rena ka maleme a rena! Leleme la gago ke lehumo la gago. Maleme a rena ke lehumo la rena ka ge a rwele tsebo le kwešišo ya rena ya bophelo.
“Ge leleme le ehwa, ga go hwe leleme feela eupša go hwa le histori, setšo le boitsebo bja batho bao ba bolelago leleme leo. Ditsebi di re letšatši le lengwe le le lengwe go hwa maleme a mararo mo lefaseng … letšatši le lengwe le le lengwe. Maleme a rena ga se a swanela go ba karolo ya dipalopalo tše mola nna le wena re le gona. Nna le wena re na le maatla a go šomela maleme a gaborena. O na le maatla a go hlabolla le go godiša leleme la gago. O na le maatla a go ngwala ditsebišo, ditaba le dikanegelo ka leleme la gago gore o kgone go di abelana le magageno. Re na le boikarabelo bja go ruta le go hlohleletša bana ba rena go ithuta le go ruta ba bangwe maleme a rena. Ka moka a re rwaleng boikarabelo bja go go godiša, go hlabolla le go thekga maleme a rena ka go ngwala ditaba le dipuku ka wona,” Nengovhela a realo ge a ruma.
