Mokgalabje yo go dumelwago gore ke moetapele go ditiragalo tše mmalwa tša go utswiwa ga
diruiwa tšeo di utswitšwego seleteng sa Vhembe o golegilwe ke maloko a ditsebi tša bosenyi
tša Makhado le sehlopha sa diruiwa tša go utswiwa. Go golegwa ga gagwe go tla ka morago
ga gore maphodisa a hwetše ngongorego mabapi le dikgomo tša go utswiwa tšeo di bego di
laišitšwego ka gare ga koloyana yeo e bego e gogwa ke sefatanaga sa bene sa Toyota seo se
bego se šetšwe morago ke sefatanaga se sengwe seo se sa tsebjego motseng wa HaRathidili
go la Tshilwavhusiku go la Makhado.
Mmoleledi wa maphodisa a Limpopo, Colonel Malesela Ledwaba, o re maphodisa a ile a leka
go emiša sefatanaga se fela sefatanaga seo se bego se sa tsebje se ile sa kgona go timelela
mme mootledi yo a bego a otlela sefatanaga sa go rwala dikgomo a golegwa le semetseng.
“Mogononelwa yoo mengwaga ya gagwe e sa tsebjego ka se sebaka o ile a laetša maphodisa
moo mokgalabje yo a lego gona go la Botlokwa,” a realo.
Ledwaba o re mokgalabje yo wa mengwaga ye 60 o ile a hwetšwa mme a golegwa karolong
ya Vuka Section go la Mokomene, Botlokwa.
Mogononelwa yo o ile go tšwelela pele ga kgoro ya tsheko ya Morebeng e se kgale molatong
ya go hwetšwa a swere leruo leo go gononwago gore le utswitšwe.
Mokhomišinare wa maphodisa a Limpopo, Lieutenant-General Thembi Hadebe, o retile
tšhomišano magareng ga badudi le maphodisa yeo e thušitšego gore bagononelwa ba
golegwe.
