Badudi ba be ba tšhogile ba nagana gore ba ile go lahlegelwa ke maphelo a bona. Se ke ka
morago ga gore madimo a maatla ao a bego a sepetšana le sefako a hlakahlakantšhe naga
moo dintlo di senyegilego, badudi ba šala ba sena mo ba ka robalago gona.
Dipula tšeo tše maatla di faletše go ralala le profense ya Limpopo magareng ga kgwedi ya
Diphalane 2024 le Dibatsela 2024.
Malapa a go lekana 160 motseng wa GaMashishi, Strydkraal A le Mashung, GaNkoana
masepaleng wa selegae wa Fetakgomo-Tubatse a ile a amega. Metse e mengwe dileteng tša
Mopani le Capricorn le yona e ile ya amega o šoro.
Badudi ba re ba be ba nagana gore ba ile go hlokofala ge ledimo le thoma. “Re thomile re
nagana gore go na le motho yo a lahlelago maswika ka godimo ga ntlo. Re ile ra tšhoga kudu
ge re lemoga gore ke sefako. Ga sa nka ra bona selo sa mohuta wo,” gwa realo Pinkie
Phogole (38).
Ba bangwe ba re ga ba tsebe gore ba ile go thoma kae go tsošološa malapa a bona. Phillip
Monama (40) o re ledimo le sentše se sengwe le se sengwe tseleng ya lona.
“Masenke a be a palakane le naga mme le difatanaga di senyegile. Bontši bja badudi ga ba
šome ebile ga se ba beya mašeleng a go lebana le seemo se. Ka fao, re rapela gore mmušo o
thuše,” a realo.
Badudi ba ipiletša go mmušo gore o ba thuše go tsošološa dintlo tša bona, kudu bao ba nago
le barutwana ba mphato wa marematlou ka ge ba ngwala ditlhahlobo.
Meyara wa Masepala wa Selete sa Sekhukhune, Cllr Minah Bahula, o ile a laetša
kwelobohloko ya gagwe go malapa ao a amegilego.
O re masepala, ka tšhomišano le Dimasepala tša selegae le mmušo, ba ile ba thuša ba bangwe
ba badudi ka go ba abela mapai le tše dingwe tša go robala.
“Re ikemišeditše go thuša go masetlapelo ka moka mme re eme lehlakore ka lehlakore le
badudi ba rena nakong ye e boima,” a realo.
Molekgotlaphethiši wa Kgoro ya Pušotirišano, Bodulo le Merero ya Setšo, Basikopo
Makamu, o re sehlopha sa bona sa masetlapelo se šoma le ba dikantoro tša dilete go thuša bao
ba amegilego.
Tiragalo ye e swana le yeo e ilego ya direga Seshego ka ntle ga Polokwane ka 2020 moo
ledimo le ilego la tlogela tshenyo ya go šiiša go malapa gammogo le difatanaga.
