MMEGI WA SEIPONE
POLOKWANE: “Boikarabelo bja rena bjalo ka SCOPA, ke go lekola ka fao dikgoro le makala
a mmušo a dirišago ditšhelete tša balefalekgetho ka gona. Ke mošomo wa rena go bona gore
sente e nngwe le e nngwe ya balefalekgetho e dirišwa ka boikarabelo go phethagatša diprojeke
tšeo e ntšheditšwego go di phethagatša. Nepo ya rena mamohla ke go lekola ka fao Limpopo
Economic Development Agency (LEDA) e šomago ka gona. Go tšwa morago ngwageng wa
2014, lekala le le be le sa šome gabotse. LEDA e bohlokwa kudu mo profenseng go hlabolla le
go godiša ekonomi, go hlola dikgoba tša mešomo le go abela badudi ditirelo tše bohlokwa ,”
gwa realo Modulasetulo wa SCOPA, Mme Esther Mokoele, ge a bula kopano.
“Na ke ka lebaka la eng LEDA e sa šuthe go maemo a yona a dipego tša tekolo ya
Molaodipharephare wa Matlotlo a Setšhaba? Mo nakong e telele pego ya lena e phela e na le
ditshwayotshwayo (qualified audit)?” gwa botšiša yo mongwe wa maloko a komiti.
“Karolo ya bothata ke go palelwa ga rena go kgoboketša tšhelete yeo re e kolotwago. Re
beakantše diwekešopo tša kotara ka kotara go hlahla bašomi ba rena ka taolo e kaone ya
ditšhelete gore ba kgone go dira ditekolo tša ka gare, go lebelela moela wa ditšhelete le go
lekola ditiragalo tša bomenetša. Re nagana gore magato a a tla kaonafatša modiro wa rena,”
gwa hlalosa Molaodiphethiši wa Sehlopha wa LEDA, Mna T Makhuvha.
“Na dipego tša lena tša ditekolo le dinyakišišo tša lena tša ka gare di kae? Kotara e nngwe le e
nngwe, setheo sa lena se be se swanetše go ala pego ya gore na le dirileng ka dikoloto le taolo
ya tšhomišo yeo e sa dumelelwago ya ditšhelete (irregular expenditure). Di kae dipego tša
lena?” gwa botšiša leloko le lengwe la komiti.
Maloko a SCOPA a laeditše go se kgotsofatšwe ke mokgwa wo Great North Transport (GNT) e
laolwago ka gona. Maloko a dumela gore GNT e be e swanetše go ba e šoma bokaone ka
lehlakoreng la ditšhelete ka ge e rwala diketekete tša batho letšatši ka letšatši. GNT e tlamegile
go thuša go godiša ekonomi ya profense ka go iša bašomi mešomong ntle le mathata a mantši.
Maloko a na le kgopolo ya gore go GNT ditaetšo ke tša gore batho ba šoma ka mokgwa wo ba
ratago ka gore ga go na taolo ya ditlamorago tša tšeo di diregago modirong.
LEDA e ukametše ditheo tše tshelelago tša go akaretša Risima, Limpopo Connexion, MMSEZ,
GNT, New Era le Corridor Mining. Maloko a komiti ga a kgotsofatšwe ke taba ya gore New
Era yeo e swaranego le merero ya inšorense, e na le diofisi Gauteng fela ga e na diofisi mo
Limpopo mola e le setheo sa Limpopo. Maloko a nyaka gore khamphani ye e tloge Gauteng
mme e hlome diofisi mo Limpopo.
“Komiti ye e le rometše dipotšišo tšeo e nyakago gore le di arabe thwii. Pego ya lena e bega
ditaba ka go rarela mme o swanelwa ke go bala matlakala a mararo pele a ka hwetša ntlha e
tee. Ga se ka fao komiti ye e nyakago pego ka gona. Komiti ye e nyaka dikarabo tša go re thwii
esego tša go rarela. Ka gona, le ya go šomana le pego ye ya lena, le e lokiše gore dikarabo di re
thwii. Re tla kopana le lena gape mo nakong yeo e sa fetšego pelo gore re tle re lekole pego ya
lena yeo e kaonafaditšwego,” Modulasetulo a realo a laela baetapele ba LEDA.
“LEDA e thadile leano la go retolla lekala le gore le be le šoma gabotse mo nakong ya
dikgwedi tše tshelelago. Karolo ya leano le ke go dira gore go be le tirišano magareng ga
ditheo tša yona. Go fa mohlala, re nagana gore New Era e ka dirišana le Risima gore ge batho
