DITATŠU: Letšatši e be e le la 26 Diphalane (Oktoboro) 2024. Lefelo e be e le motse wa
Ditatšu tikologong ya Senwabarwana ge o šetše o batametše dithaba tšela ba rego go tšona
mmutlanyana se na le mokgwanyana wa go makatša batho … dithaba tša Malebogo. Morero
wa letšatši e be e le go keteka katlego ya Dr Mothapo Foundation yeo bjalo e ngwadišitšwego
semmušo. Magareng ga baeng bao ba bego ba memilwe, go be go na le khwaere ya bana ba
bannyane ba Sekolo sa Praemari sa Mohlabi.
Ka yunifomo ya bona ya dihempe tša mmala wa gauta le marokgo goba dikhethe tše
ditshehla, bana ba e be e le mmitša wo o ka se o tshedišego mahlo gabonolo. Ka lešatana la
bona, go kitimišanakitimišana ka matšato, go kwerana le go sega, go be go bonala gore ba ke
bana ba sekolo sa tlasana. Tše e be e le dikgopana tšeo di tletšego bophelo le mafolofolo. Fela
ge o lebeletše bana ba ba ituletše ka tenteng ya bona ka thokwana, o be o ka se akanye gauta
yeo ba e hupilego ka maganong a bona go fihlela ge ba diragatša.
Taba ya go se tlwaelege ka khwaere ye ke gore e be e otlelwa ke morutwana. Mošemanyana
yo mosesenyane yo motelele wa mengwaga yeo e ka bago e lesomepedi e be e le yena
mootledi wa khwaere. Morutišigadi, yo e lego mohlahli wa khwaere, o be a ituletše kua
thokwana le dithaka tša gagwe, le yena a bogetše bjalo ka mang le mang bothakga bjoo bana
ba gagwe ba bego ba bo tšweletša … bothakga bjoo a ba rutilego bjona gore ba ye go
phadimela ditšhaba ka gauta yeo ba lego yona.
Mošemanyana o be a otlela khwaere bjalo ka motho wa boitemogelo yo a tlwaetšego go dira
bjalo. Bjalo ka batho ba bagolo, mošemanyana o be a pidinya dilo tša gagwe go fa khwaere
segalo seo e swanetšego go opela ka sona. Mošemanyana o be a otlela khwaere ya gagwe … a
phagamiša matsogo fao koša e yago godimo … a eya nayo … a namelela a eya godimo … a e
swarelele maemong a tee lebakanyana pele a e theošetša tlase ka boiketlo. Ge a tla go bolaela
sa ruri mošemanyana, ke ge a thoma go šikinya letheka … a tšibatšiba a eya ka thoko ye … a
eya ka thoko yela … a katakatela morago gomme khwaere ya gagwe e mo šetše morago e dira
tšona tšeo yena a di dirago … bana ba eya le koša okare ba tsenwe…
Ke fela ke ekwa go thwe malopo a tsena batho ba bagolo bao ba tsebago dilo tše dintši ka
bophelo. Ka ge ke sa tsebe selo ka malopo, yeo taba ga ke e ganetše fela ke nagana gore go
na le mehuta ya go feta o tee ya malopo. Ke nagana gore go na le malopo a semoya fao batho
ba etelwago ke badimo ba gabobona go ba fa melaetša ka dilo tša bophelo. Fela ke nagana
gore go na le mohuta o mongwe gape wa malopo – malopo a koša. Le bana ba tsenwa ke
mohuta wo wa malopo – malopo a koša. Ka fao mohlahli le khwaere ya gagwe ba bego ba
bina ka gona, o be o bona gore ba bangwe ba bana ba ga ba sa bina ka go itiriša … go na le
maatla a mangwe … mafolofolo a mangwe … boipshino bjo bongwe bjo go bjona motho a
lahlegelwago ke taolo ya tšeo a di dirago…
Fa moya wa malopo o tšeyago taolo mme motho a ikhwetšago bakeng sa go ya le koša, koša
e eya le motho – koša e tšeya motho wa yona ya mo thinyathinya letheka, ya sopagantšha
maoto a gagwe le go mo thwantshiša menwana. O se ke wa forwa ke motho, rena re bone ka
khwaere ya sekolo sa Mohlabi gore le bana ba tsenwa ke malopo … malopo a koša.
