KGWEBO YA MADILA E TŠWELETŠA DIAPARO TŠA MAEMO A GODIMO
BOTLOKWA: Koko Paulina Ramusi (63) o fetotše kgwebo ya ratswale wa gagwe yo a hlokofetšego ya go rekiša madila go ba kgwebo ya go roka diaparo. Se ke ka morago ga gore Koko yo e lego morutišigadi wa maloba a lapišwe ke go bona dintwa le mathata ao a hlolwago ke kgwebo yeo ya madila motseng wa GaMangata go la Botlokwa ka ntle ga Polokwane.
Ka 2019 Koko Ramusi o ile a tšeya sephetho sa gore moago wo o swanetše go tšweletša dilo tše dibotse tša go matlafatša maphelo a badudi esego go oketša bosenyi motseng wa bona. Ratswale wa gagwe, Ramolao Collins Ramusi, o hlokofetše ka 1996 mme a tlogela kgwebo yeo ya madila matsogong a gagwe.
“Ba go nwa madila ba be ba hlola dintwa mme ba bangwe ba bona ba gobala mola bosenyi bo be bo golela godimo motseng. Ke ka fao ke ilego ka bona go le kaone gore ke tswalele kgwebo yeo ya bjala,” a realo.
Koko Paulina o re o ile a fetola kgwebo yeo ya madila go ba kgwebo ya go roka diaparo yeo a e bitšago Ntema Investments mme e hlotše mešomo go badudi ba 20.
Gabjale kgwebo yeo e šoma gabotse moo bašomi ba 19 ba šoganago le didirišwa tša go roka diaparo. “Ba roka diaparo tša sekolo, tša go itšhireletša (personal protective clothing), tša baletadikgoro, dikhamphane, gammogo le diaparo tša setšo,” a realo.
O re ke bona mohlala o mobotse wa gore bommakgwebo ba go dula metsemagaeng le bona ba ka tšwelela kgwebong.
“Re ikgantšha ka go hlola mešomo, kudu re lebeletše mo kgwebo e lego gona. Re thabile ka ge re kgona go dira diphetogo maphelong a bašomi ba rena ka ge re kgona go ba abela tsebo le boitemogelo bja tšweletšo ya diaparo,” a realo.
Go bašomi ba gagwe, 15 ya bona e be e se na mangwalo a thuto ya godimo, tsebo goba boitemogelo pele ga ge ba ka thwalwa.
“Thuto yeo re ba abelago yona e fihla kgole ka go ba matlafatša ka tsebo le boitemogelo bjo bo nyakegago bja go tšweletša diaparo tša maemo a godimo,” a realo ka boikgantšho.
Koko Paulina o re thekgo yeo ba e hwetšago go badudi e okeditše kgwebo ya bona. “Re leanong la go dira menyetla e mengwe ya mešomo ka ge re ile go godiša kgwebo ye ka lebaka la mešomo yeo re e hwetšago go bareki ba rena,” a realo.
Ishmail Mokoena (49) o thomile go šoma kgwebong ye ka 2023. “Kgwebo ye e nthutile tše ntši. Ga bjale ke tseba go šomiša didirišwa gammogo le go roka diaparo. Ke hweditše maitemogelo ebile ke kgona go fepa bana ba ka,” a realo.
