Kgošigadi ‘Monešapula’ Masalanabo Modjadji VII (18) wa setšhaba sa Balobedu o dirile
histori. Se ke ka morago ga gore a tšwelele gabotse dithutong tša gagwe tša marematlou mme
se se mo dira gore e be yena Kgošigadi ya mathomo ya Balobedu ya go fetša dithuto tša
marematlou. Kgošigadi Masalanabo o tsebagaditšwe semolao bjalo ka Kgošigadi ya
Balobedu ke Presidente Cyril Ramaphosa ka Manthole 2024.
Gabjale ba lapa la bogoši gammogo le setšhaba ba ikgantšha ka katlego ya gagwe ka ge e le
sešupo sa maikemišetšo a gagwe a go šoma ka thata. Se ke ka lebaka la gore maikemišetšo a
gagwe go tša thuto a ba bjalo ka tlhohleletšo go baswa ebile e le mohlala o mobotse go
bohlokwa bja thuto go fihlelela tše dibotse.
Bjale o lebeletše go tshela mollwane o mongwe ka ge mahlo a gagwe a lebeletše go tšwetša
dithuto tša gagwe pele yunibesithing. Mokgoma yo mogolo wa mošate wa setšhaba sa
Balobedu, Ngk Mathole Motshekga, o re Kgošigadi Masalanabo o ba makaditše kudu ka
moka.
“O fetile leetong le boima kudu nakong ya ge a gola ka gore ge a thoma go dula le rena, o be
a fetola dikolo kgafetšakgafetša. O ile a palelwa ke go ya mphatong wa mathomo (Kreiti 1)
nakong ya ge re mo hweletša sekolo,” a realo.
Ngk Motshekga o re ba ile ba swanelwa ke go nyaka barutiši ba ka thoko le go mo hweletša
dithuto tša tlaleletšo go mo thuša.
“Re ile ra hwetša sekolo mme a thoma ka mphato wa bohlano. O thabile ka ge a tšweletše
gabotse dithutong tša gagwe ka gore o šomile ka thata,” a realo.
O re Kgošigadi Masalanabo o thabile go ba Kgošigadi ya mathomo ya Balobedu ya go fetša
marematlou mme o nyaka go tšwela pele ka go tšwetša dithuto tša gagwe pele.
“Re gare re boledišana le yena ka taba ya dithuto tša gagwe ka gore re rulaganya moletlo wa
wa go mo hlomamiša semmušo bjalo ka Kgošigadi ya Balobedu,” a realo.
Motshekga o re Kgošigadi Masalanabo o nyaka go ithutela tša molao goba tša tlhabollo ya
leago ka ge di tlo kgona go tšweletša setšhaba sa Balobedu.
“Se ke ka lebaka la gore o etile pele setšhaba sa sebjalebjale, ka fao o nyaka go ba Kgošigadi
yeo e rutegilego gore a kgone go fihlelela maemo a batho bao a ba etilago pele,” a realo.
Moletlo wa wa go hlomamišwa o ile go dirwa ka kgwedi ya Hlakola 2025.
