Se se latela ka morago ga mengwaga badudi ba Mokopane le metsemabapi ba lla ka ditirelo tša maemo a fase tšeo ba bego ba di hwetša dikantorong tša bona tša kgale. Ba be ba gapeletšega go tsoga esale mesong gore ba kgone go fihla ka pela ba hwetše thušo efela ba feleletša ba ema letšatši ka moka ntle le go hwetša thušo.
Badudi ba re ba thabile mme ba dumela gore dikantoro tše tša maemo a godimo di ile go matlafatša ditirelo tšeo e lego kgale ba di hloka.
“Ke kgale re emetše letšatši le mme re thabišwa ke ge le fihlile ka gore ke kgale re hlaka,” gwa realo Francinah Mokoka (37).
Kholofelo Mahlatji (33) o re ka dinako tše dingwe dikgokaganyo tša inthanete di ba di šoma ka lebelo la go nanya mme se se ba gapeletša gore ba eme lebaka le letelele ka modiro wo o ka tšeago metsotso feela.
“Bana ba rena ba ile go kgona go dira dikgopelo tša dipukwana tša boitsebišo mme ba di hwetša ka pela. Ye ke tlhabollo e kaone lefelong la rena,” a realo.
Presidente Ramaphosa o ile a bula gape dilori tša go thetha tše 100 tšeo di šomago mešomo ya ka dikantorong tša Merero ya Selegae. Dilori tšeo di ile go phatlalatšwa le diprofense ka moka, kudu metsemagaeng.
Ramaphosa o kgadile bašomi gore ba tlogele go tšwafa mme ba thuše badudi gore ba se eme methalading nako e telele. “Ke kgopela gore le thuše badudi ntle le go kgopela šunya,” a realo.
O re badudi ba ile go fihlelela ditirelo tša Kgoro ya Merero ya Selegae, kudu metsemagaeng. “Ga se gantši moo kgoro ya mmušo wa rena e thakgolago thušo ya ditirelo tša go tsenelela go swana le ye mme se ke go iša pušo bathong,” a realo.
Tona ya Kgoro ya Merero ya Selegae, Dr Aaron Motsoaledi, o re ba thakgotše gape lenaneo la didirišwa tša go šoma tšeo di šomago go swana le didirišwa tša go ntšha tšelete mme di ile go phatlalatšwa le dikantoro tša bona naga ka bophara.
“Ka didirišwa tše, badudi ba ile go kgona go dira dikgopelo tša ditokomane tša bona tšeo ba di timeditšego go swana le pukwana ya boitsebišo le tše dingwe mme ba di hwetša gona moo ntle le go tsena ka dikantorong.
“Go tšwa go dilori tše tše 100, re ile go tlogela tše 14 mo profenseng ya Limpopo mme tše dingwe di ile go phatlalatšwa le naga ka bophara. Badudi ba ka se sa sepela maeto a matelele go hwetša ditirelo ka gore dilori tše di ile go dula metseng ya bona,” a realo.
Tonakgolo ya Limpopo, Chupu Mathabatha o rile: “Lenaneo le le tlile go tliša diphetogo maphelong a badudi ba rena. Ka fao, re ba kgopela gore ba le hlokomele.”
