Poledišano ye e swerwe
hotelengtsoko ka ntlenyana ga Polokwane ka Mokibelo wa 27 Mopitlo (Mei) 2023 moo Nthabiseng le
monna wa gagwe, Pastor France Ngoepe, ba boletšego ka maikemišetšo a kopano.
Batho ba mengwaga ka moka ba tsenetše poledišano, go akaretšwa le batsebalegi… ke bolela ka batho ba
go tuma bao re ba bonago disekrineng tša rena tša thelebisene letšatši le letšatši, Bangwadi ba dipuku le
diopedi bjalo ka Nkanyiso Bengu (go tšwa go Joyous Celebration) le baruti go tšwa profenseng ka
bophara ba bile gona, ke sa lebale le Bishop Mokhubo
Go abelanwe kudu go tšwa go diboledi tša go fapana ka dintwa tša bona tša bophelo bja monagano.
Senzekile Shongwe, yo e lego moeletši wa bophelo bja monagano e bile e le mofahloši wa maphelo a
monagano, o abelane tsebo ya gagwe ka bophelo bja monagano. O rutile batlakopanong ka mekgwa ya go
swarana le kgatelelo le tšohle tšeo di ka lebišago go kgatelelo. “Ge o se na tsebo ya dika tša mathata a
monagano, o ka se tsoge o rarolotše ditaba tša bophelo bja monagano,” a realo.
Moswaramarapo wa letšatši, Rorisang Thandekiso, o thadile seswantšho sa bophelo bjo bobotse bja
monagano. Neo Mabitsela o abelane le batlakopanong taba ya ka fao manyami a mo hlolelago kgatelelo
ya monagano ka gona. Batho ba bantši ka holong ba be ba bonala ba mo kwešiša ka ge ba kwešiša
kanegelo ya gagwe ka ge bontši bja bao ba kilego ba itemogela go lahlegelwa ke motho yo ba mo ratago,
ba tseba manyami a gona. O ile a abelana gape le tsela ya go tšwa kgatelelong ya monagano le ka fao
Modimo a mo thušitšego ka gona ka morago ga go lahlegelwa ke mosadi wa gagwe.
E rile ge Moruti Linda Maponyane, yo e bego e le yo mongwe wa bangwadi, a beya leoto sefaleng, moya
wa fetoga. Mosadi yo e lego seboledi sa go ba le mpho, ka kanegelo ya gagwe o tlogetše batho ba
maketše ge a bolela ka bohlokwa bja tshwarelo. O lemošitše batho gore ka morago ga gore a katwe
gabedi a nnoši, selo seo se mo lokolotšego e bile go swarela mokati wa gagwe gomme a mo tlatša lentšu
la modimo. Lehono mokati o nyetše ka lethabo ebile o godiša morwedi wa gagwe ka lerato.
Ka boleta bja molodi o mobotse, Nkanyiso Bengu, o ile a kgabiša batlakopanong ka lentšu la gagwe la
bose bja todi. Batho ba ile ba šala ba myemyela, ba mo tšeya diswantšho le go gatiša divideo ge botho bja
gagwe bo phadimela holo ka moka. Motho o kile a re go myemyela go ka fodiša motho. Se e bile
boitemogele bja ka ka Mokibelo ka ge ke bone batho ba phuthologa ka morago ga go kwa molodi go tšwa
go Nkanyiso… go phophoma lethabo difahlegong tša bona.
Nthabiseng, yo e lego mongwadi wa ‘Go Lokiša Sebjana se se Thubegilego’ o ile a tswalela poledišano.
O fane ka kanegelo ya gagwe ya go fenya go ipolaya le ka fao a thabilego ka gona gore kopano yeo e bile
katlego. O gateletše gore re ka se ithekge ka Modimo feela ka maphelo a rena a monagano eupša le thuto
ya rena ya monagano yeo e hlatsetšwego e ka thuša. O dumeletše batho go botšiša dipotšišo moo ba bego
ba sa kwešiše. Monna wa gagwe o tswaletše poledišano ka theto le thapelo.
