Kgaotšo ya mohlagase e palediša ditiši go šomiša dikhompyutha gammogo le didirišwa tša
dikgokagano mme se se palediša maphodisa go bula melato, go romela difatanaga ditiragalong tša
melato le tše dingwe.
Tsebišo yeo e abetšwego komiti ya dinamelwa le tšhireletšo ya setšhaba e utolotše gore ditiši tše 16,
kudu tšeo di lego metsemagaeng di hloka dijenereitha. Ditiši tša go thetha tše 36 go tše 57 di a šoma
efela di hloka dijenereitha nakong ya kgaotšo ya mohlagase. Timothy Maluleke (45) go tšwa
GaSekgopo ka ntle ga Modjadjiskloof o re ba dula ka poifo nakong ya kgaotšo ya mohlagase.
“Go boima go hwetša maphodisa nakong ya kgaotšo ya mohlagase ge re hlagetšwe ke mathata. Setiši
sa rena se šoma feela diiri tše tharo ka letšatši ka gore mohlagase o sepela diiri tše nne nakong ya
kgaotšo ya mohlagase mme setiši sa Modjadjiskloof se bokgole bja 30km,”
“Mahodu a dira bosenyi a tseba gore ga go seo se ka diregago. Re dula ka poifo ka malapeng a rena.
Mmušo o swanetše gore o tle ka tharollo ya ka pela,” gwa realo Maluleke.
Maphodisa le wona a re a dula a boifa gore a tla hlaselwa nakong ya kgaotšo ya mohlagase, kudu
bošego.
“Re boifa gore re tla hlaselwa. Nako ye nngwe re tswalela setiši ra emela mohlagase o bowa. Ge
mohlagase o bowa re hwetša bontši bja melato mme re palelwa ke go e šetša ka moka ka nako. Ka
morago ga se, badudi ba a re roga ba re botša gore re a tšwafa,” gwa realo lephodisa la megwaga ye
34.
Mmoleledi wa dinamelwa le tšhireletšo ya setšhaba mokgatlong wa Democratic Alliance ka Limpopo,
Katlego Phala, o re ba tshwenywa ke tlhokego ya dijenereitha ditišing tša maphodisa.
“Go profense yeo e lego ka fase ga tlhaselo ya mahodu, maphodisa a rena a swanetše go hwetša
didirišwa ka moka gore a kgone go itšhireletša gammogo le go šireletšs badudi,” a realo.
Molekgotlaphethiši wa Kgoro ya Dinamelwa le Tšhireletšo ya Setšhaba, Florence Radzilani, o re ba
lenaneong la go reka dijenereitha go efola tlhokego ya mohlagase ditišing ka moka nakong ya kgaotšo
ya mohlagase.
“Lenaneo le la go reka dijenereitha le gare le a kgatlampana mme re holofela gore le tla ba le
phethilwe mafelelong a kgwedi ya Mosegamanye ka ge le sepetšwa ka lebelo go rarolla bothata bjo,”
gwa realo Radzilani.
