Ba kgopetše thušo gore ba hwetše setulo sa go thetha efela megokgo ya bona e feletše fase. O
be a šomiša setulo sa go thetha seo se senyegilego mme se palelwa ke go dira mošomo wa
sona.
“Go be go le boima go dula setulong seo. Moya wa ka o be o fetoga nako le nako ge ke
swanetše go se šomiša ka ge ke tseba gore nako ya go kwa bohloko e fihlile. E be e le bjalo
ka tshotlego go nna,” gwa realo Thanyani ka bodutwana.
Thapelo ya gagwe e ile ya arabja nakong ya ge a hwetša setulo se seswa sa go thetha go tšwa
go Tshifhiwa Magoma yo e lego moetapele wa Magoma Foundation ka Laboraro, 3 Mopitlo
2023.
E be e le nakong ya lenaneo la tshepedišo ya setulo sa go thetha moo Magoma a ralalago le
metse ya Limpopo a abela bagolofadi ditulo tša go thetha mme o šetše a abetše bagolofadi ba
bane (4) ditulo mola ngwaga wa 2023 o thomago.
Thanyani o be a thabile kudu ge a be a dula setulong sa gagwe mme a se thethiša. “Ke be ke
lahlegetšwe ke tshepo ya gore ke tla tsoga ke hweditše setulo se. Go tloga gabjale ke ile go
sepela gabotse ntle le tšhitišo mme ke tla kgona go hlabja ke phefo gabotse ntle le go nyaka
thušo. Thapelo tša ka di arabilwe,” a realo.
Mmagwe, Agnes, o re o thabišwa ke gore setulo se ga se mo kweše bohloko. “Se dirile gore
ngwanaka a kgone go ba le lethabo pelong ya gagwe ka ge e le seo e lego kgale ke se bone go
yena,” a realo.
Magoma o boditše Seipone gore nepo ya bona ke go thabiša le go thuša bao ba hlokago. “Re
bone go lokile go mo abela setulo se ka ge se mo swanetše. Lethabo leo ke le bonego
sefahlegong sa gagwe ge a bona setulo se se dirile gore pelo ya ka e myemyele,” a realo.
Magoma o kgopela bao ba swerego ditulo tša go thetha tšeo ba sa di šomišego gore ba di tliše
go Foundation)ya gagwe mme a kgone go di fetišetša go bao ba di hlokago.
“Le ge di senyegile, re a di kgopela. Re tla nyaka batho ba go tseba gore ba di lokiše mme di
šome gape,” gwa realo Magoma.
