O re meineholo o dirile letangwana kgauswi le lapa la gagwe mme diruiwa tša gagwe di ntšha lenyora gona fao. “Ke na le dikgomo tše 19, dipudi tše 15 le dinku tše 10 mme ka moka di nwa meetse ao a kelelatšhila ge ke se gona. Ka morago ga moo di thoma go fokola,” a realo.
O re o lahlegetšwe ke kgomo mafelelong a 2023, a buša a lahlegelwa ke e nngwe mathomong a ngwaga wo. “Kgomo e nngwe e gare e a fokola mme ke boifa gore le yona e ka hwa. Ke boifa gore ke ile go lahlegelwa ke leruo la ka ka moka ka lebaka la bothata bjo,” gwa realo Lenkwe ka manyami.
O re mothopo wo wa kelelatšhila o na le dibeke tše pedi o elela. “Ge re tlaleya bothata bjo, bašomi ba tla ba lokiša efela ka morago ga matšatšinyana bothata bjo bo thoma gape,” a realo.
Lenkwe o re kelelatšhila ye e dira gore maphelo a bona a be boima ka ge barutwana gammogo le difatanaga ba palelwa ke go feta mo letangwaneng.
“Monkgo wo o tšwago mo ga o kgotlelelege mme o kotsi maphelong a badudi ka ge ba bangwe ba thomile go fokola,” a realo.
O re ba begile bothata bjo go Masepala wa Selete sa Sekhukhune efela ga se go direge selo. “Ke ile go swaya masepala phošo ge nka tšwela pele go lahlegelwa ke leruo ka lebaka la kelelatšhila ye. Ka fao dilo di emego ka gona, tokelo ya rena ya go dula lefelong la go hlweka, la go šireletšega e a gatakwa,” a realo.
Mmoleledi wa Masepala wa Makhuduthamaga, Lemson Moropjane, o re ba amogela seemo se mme ba ile ba tšeya magato a go lokiša meineholo wo ka Sontaga sa 11 Dibokwane 2024.
“Sehlopha se sengwe sa bašomi se ile go lebelelana le bothata bjo. Bothata bo tšwelela go mokgwa wa kago (design) ya tsela ya kelelatšhila ye, kudu mafelong a godimo ao a paledišago maatla a go elela ga ditšhila mme se sa dira gore meineholo o thibane,” a realo.
Moropjane o re masepala o maemong a go kgetha ditsebi tšeo di tlago go tla ka mokgwa wa kago o mokaone wa meineholo wo. “Tekanyetšo ya mašeleng a projeke ye e beetšwe ngwaga wo o latelago wa mašeleng wo o thomago ka Phato (Agosetose). Re kgopela setšhaba gore se se fele pelo … bothata bjo bot lo rarollwa” a realo.
