“Re amogela gore go sa na le ditlhotlo tšeo di šaletšego morago bjalo ka kabo ya meetse le diprotšeke tšeo di nago le mengwaga di gana go fela. Ke boikarabelo bja rena ka moka go šogana le ditlhotlo tše le go tiišetša gore ditlhotlo tšeo di lego gona di rarollwa ka lebelwana go hola badudi ba gaborena. Go feta fao, kopano ya Khansele e laeditše thekgo go setheo sa bogoši ka go amogela baetapele ba mmalwa bao ba tšweleditšwego go amogelwa mme ba kgotsofatša dinyakwa tša maleba. Se se laetša boikgafo bja go phagamiša le go boloka bohwa bja rena bja setšo, go hlohleletša kopano le tlemagano ya leago ka gare ga ditšhaba tša gaborena.
“Ge ke nagana ka mengwaga ye 30 yeo e fetilego le diphihlelelo tšeo ke di phagamišitšego Polelong ya ka ya Maemo a profense ka Dibokwane, ke tlalwa ke moya wa boikgantšho ka tšwelopele yeo re e dirilego mo Limpopo ka tlase go boetapele bja ka,” Mathabatha a realo ge a tšwela pele. “Tše dikgolo di akaretša tšeo di latelago:
Mafarahlahla: Go phethwa ga diprojeke tše dikgolo tša mafafarahlahla – go agwa le go kaonafatšwa ga ditsela, dikolo, dipetlela le dinolofatši tše dingwe tšeo di kaonafaditšego go fihlelela ditirelo le ditiragalo tša ekonomi.
Kgolo ya ekonomi: Koketšego ya dipeeletšo le dikgoba tša mešomo. Tlhohleletšo ya tlhabollo ya ekonomi makaleng a diholoseila le thekišo, temo, meepo le boeti.
Thuto le tlhabollo ya bokgoni: Mananeo a go kaonafatša boteng (boleng) bja thuto le a tlhabollo ya bokgoni bja baswa. Katlego ya dipoelo tša marematlou tša go fihla go 79,5% ngwagola e tiišetša tšwelopele yeo.
Kaonafatšo ya maphelo: Peeletšo go mafarahlahla le ditlabakelo tša maphelo, kaonafalo go kabo ya ditirelo tša maphelo, phokotšego ya phetetšo ya HIV go tloga go mma go ya go lesea, go hlongwa ga Khansele ya AIDS ya Profense ya Limpopo.
Tlhabollo ya leago: Mananeo a tlhabollo ya leago go imolla bodiidi, tlhokego ya tekatekano le ditlhotlo tša leago, kudu Dikgaruru tšeo di Ithekgilego ka Bong (GBV) le polao ya basadi (femicide).
Pušo e botse: Pušo e botse, bopepenene le boikarabelo di be di beilwe pele. Baetapele ba serithi ba boitshwaro bjo bobotse. Kaonafatšo ya dipego tša tekolo ya matlotlo ke Molekodipharephare wa Matlotlo.
“Ka kakaretšo, pušo ya ka e tsebega ka boikgafo bja go kaonafatša maphelo a batho ba Profense ya Limpopo ka tlhabollo yeo e tšwelago pele, tlhabollo yeo e akaretšago bohle le pušo ya bokgoni. Diphihlelelo tše di dirile mošito mo profenseng wo o adilego motheo o maatla wa tšwelopele le katlego ya ka moso. Go tšwa boteng bja pelo ya ka, ke rata go leboga batho ba Limpopo ka thekgo yeo e sa tekatekego, tshepo, go tšweletša dikgopolo le ditsholo tša go agiša mo mengwageng ye 11 yeo ke bilego le letlhogonolo la go eta profense ye pele. E bile boitemogelo bjo bogolo go šoma bjalo ka Tonakgolo.
“Ke leboga monyetla wo wa gore ke be le seabe go tlhabollo le diphetogo tša go iša katlegong ya naga le profense ya rena e botse. Ge ke itokišetša go neela taolo yeo e tsenago marapo, ke na le tshepo ya gore motheo wo re o adilego mmogo e tla ba mmotwana wo go wona profense e tla fofago go fihlelela diphihlelelo tše dikgolo go feta tše mengwageng yeo e tlago. A re tšweleng pele go šoma mmogo, go kopana ka boitlemo bja go aga bokamoso bja go phadima go badudi ka moka ba Limpopo,” Mathabatha a realo ge a ruma.
Chupu ‘a Marema’dipekwa o tlile, a bona, a šoma ka thata le boikgafo mme bjale o fologa sefaleng ka serithi le boikgantšho.
