Naa batho ke ba mang na? Naa nna le wena ke rena ba mang? Na nna le wena ke rena ba rena goba
karolo e nngwe ya rena ke ya batho ba bangwe bao e sego rena? Go re nna le wena ke rena ba rena ga
se taba yeo ke e ganang le gatee fela seo ke se botšišago ke gore na ke rena ba rena go fihla kae? ‘Go
fihla kae’ ke yona potšišokgolo…‘go fihla kae?’ Na nna le wena ke rena ba rena ka gohlegohle? Ge re
e beya ka mokgwa wa dipalopalo re ka re na nna le wena ke rena ba rena diphesente tše lekgolo
(100%) goba bjang? Na ke nna wa ka 100% gomme le wena ke wena wa gago 100%? Na batho ke
bona ba bona 100%? Ge e le gore batho ga se bona ba bona 100%, gona batho ke bona ba bona
diphesente tše kae? Na ke wena wa gago diphesente tše kae?
Dibaka ke tše dintši tša gore nna le wena ge re ilale, re bopapago le bommago batho ba bangwe, re
borangwane, bommane (bommangwane), boramogolo, bomamogolo le borakgadi ba batho ba
bangwe. Batho ba ge ba bitša nna le wena, ba re papa goba mma wa ka, rangwane le mmane wa ka,
ramogolo le mamogolo ba ka, rakgadi wa ka. Ka tumelelo goba ntle le tumelelo ya ka le wena, batho
ba ba bona nna le wena bjalo ka karolo (goba re re thoto) ya bona. Batho ba ba bona nna le wena bjalo
ka karolo ya dilo tšeo e lego tša bona (esego tša rena), dilo tšeo ntle le tšona ba ka se iponego ba
feletše bjalo ka batho. Ge batho ba phegelela gore o mma, papa, mogatšamalome, buti, sesi , moratho
goba motswala wa bona… ba re o karolo ya dilo tšeo ba rego ke tša bona (esego tša gago), na go dira
tlhaologanyo go fihla kae go botša nna goba go botša wena gore ke wena wa gago 100%?
Batho ke bagwera le metswalle ya batho ba bangwe, batho ke baagišani le bašomišani goba badirišani
ba batho ba bangwe. Batho ba ge ba bona batho bao ba re bagwera ba ka, metswalle ya rena. Batho ba
bolela ka baagišani le badirišani ba bona. Ka tumelelo goba ntle le tumelelo, nna le wena re rata goba
re sa rate, na re ka ba re le karolo ya batho ba bangwe bao esego karolo ya mebele ya rena…re le
karolo ya seo ba bangwe ba se bonago bjalo ka thoto ya bona (esego ya rena)? Na nna le wena re
fetogile karolo goba setseka sa batho ba bangwe feelafeela ka gobane re agišane nabo, re tswalana le
bona ka mokgwana o mongwe goba re ile ra šoma goba ra šomišana nabo? Na nna le wena ge re ilale
re karolo ya thoto ya batho ba bangwe?
Na ke nnete gore batho ga ba thabele go ba ba bona 100% eupša ba nyaka ebile ba thabela go ba
karolo goba thoto ya batho ba bangwe? Batho ba rata ebile ba thabela go ba bomma le bopapago
batho ba bangwe. Batho ba ikgantšha ka go ba bagatša, baratiwa goba batho goba thoto ya batho ba
bangwe… o rata bjang! Batho ba ipshina ka go ba bobuti le bosesi’abatho ba bangwe. Batho ba
ikgantšha ka go ba bomalome le bomagatšamalome, borangwane le bommane, boramogolo le
bommamogolo ba batho ba bangwe. Batho ba ipetha difega ka go ba bagwera, metswalle le baagišani
ba batho ba bangwe gomme ba bona bagwera, metswalle le baagišani bao bjalo ka batho ba bona…ba
ba bona bjalo ka karolo goba thoto ya bona yeo ba ka se kgonego go aroganywa nayo gomme ba fela
esale bona bona. Batho ba a rata ebile ba thabela go ba karolo goba thoto ya batho ba bangwe… go ba
bommago, bopapago, bomalome le bogatšamalome le go ba borakgadi’abatho ba bangwe…ba thabela
seo! Bjalo ge batho ba thabela go ba karolo goba thoto ya batho ba bangwe, na go dira tlhaologanyo
go fihla kae gore motho a re ke yena wa gagwe 100%?
Mafelelong, potšišo ya mola mathomong ke yona e šetšego ntle le karabo…potšišo ya go re ‘go fihla
kae?’ Na motho ke yena wa gagwe go fihla kae na? Ka morago ga ge bana ba ngwathile tšeo ba di
ngwathilego go monna goba mosadi, ditlogolo le ditlogolwana le tšona di ngwathile setsekana sa
tšona. Ka morago ga ge bagwera le metswalle, baagišani le bašomišani ba ngwathile ditseka tšeo di ba
lekanego go motho, na ke setseka se sekaakang go 100% seo motho a šalago naso? Ka gore ka kwano
le tumelelo ya gago (goba ntle le tšona), taba ya gore ke wena wa gago 100% re e beetše ka thoko, na
ke diphesente tše kae godimo ga 100% tšeo o ipethago kgara ka go re ke tša gago? Na ke wena wa
gago go fihla kae?
