Ge go bolelwa taba ya go re kgonthišetšo ya lefelo la bodulo ga se ya swanela go ba ya kgale
go feta dikgwedi tše tharo, taba yeo ke na le go e kwešiša. Batho ba bangwe ba na le tlwaelo
ya go hudugahuduga….etse ba re ke go ja hlogwana ya kgaka? O tla re o sa re motho wa
gona o dula mo, wa kwa a šetše a hudugile a le mo gongwe. Ge o sa re motho o dutše kaekae,
šole o hudugile o šetše a dula kaekanyana. Ge o sa re motho o dula kaekanyana o tla ya go
mo etela, šole o šetše a fetetše pele. Ka gona, ge bahlankedi ba nyaka bohlatse bja bodulo bjo
bo nago le setempe seo se kgatlilwego ka nako ya ka tlase ga dikgwedi the tharo, taba yeo ke
kgona go e kwešiša le go e amogela. Ke nagana gore taba ye e na le bobedi moko le bjoko.
Ge lesogana, a re le bitše ‘Moepa Thutse’, le belegwe maregeng a ngwaga wa 2000 gomme
seo se hlatselwa ke setifikeiti sa matswalo le nomoro ya boitsebišo, na dibaka ke tše kae tša
gore Moepa Thutse a ka fetoga a ba motho yo mongwe? Na Moepa Thutse yola a belegwego
maregeng a 2000 esale selo se tee le Moepa Thutse wa mengwaga e lesome? Na Moepa
Thutse wa lesogana la mengwaga ye 25 esale yena Moepa Thutse yola a belegwego
maregeng a 2000? Ntle le go gola ga mmele le go fetoga ga boitshwaro, na go na le se
sengwe seo se fetogilego ka yena? Na ge khophi ya pukwana ya boitsebišo ya Moepa Thutse
e gatišitšwe setempe sa 2015, 2018, 2020 le sa 2023, na dikhophi tše di nneteng ka go lekana,
Ge e le gore ka moka di nneteng, taba ye ya go nyaka dikhophi tšeo di gatišitšwego setempe
nako yeo e sa fetego dikgwedi tše tharo, ke ye eng? Kgatelelo yeo e sa nyakegego goba eng?
Ge Moepa Thutse a humane setifikeiti sa gagwe sa marematlou ka 2018, na khophi ya
setifikeiti seo yeo e kgonthišitšwego ka 2018, le ya 2020 le ya 2023 di nneteng ka go swana
le gona ka go lekana? Na go na le kgonagalo ya gore khophi ya setifikeiti ya 2018, 2020 le ya
2023 di ka ba le ka mokgwana o mongwe wo di ka fapanago? Na ke nnete gore khophi ya
setifikeiti sa Moepa Thutse e ka se fetoge go sa kgathalege gore na motho o e dirile letšatši,
kgwedi goba ngwaga ofe? Bjalo kgatelelo yeo e felago e bewa godimo ga setempe sa ka tlase
ga dikgwedi tše tharo e tšwa kae gona ke ya eng?
Goba kgane kgatelelo ye ke ditlamorago tša dipolitiki tša kgatelelo ya bokoloneale tša gore
motho o swanetše go tshepa esego feela motho yo a hlokofetšwego eupša yo a šetšego a
bolokilwe?
