THOMO NKGADIMA
PRAKTISEER: Go feta tšohle, lerato la gagwe la bana bao ba golago … kudu bana bao ba nago le mathata a dithuto ka sekolong goba bao ba šetšego ba tlogetše sekolo, le dirile gore a nyake go dira se sengwe go fetola maphelo a bona. O fetotše legae la gagwe sekolo sa kgakollo fao bana, go tloga ka ba mengwaga ye 6 ba Kreiti R go ya go ba Kreiti 10 ba mengwaga ye 15 ba gakollwago ka dithuto tša Mmetse, Sesotho sa Leboa / Sepedi, Seburu (Afrikaans) le Seisimane (English) ka go abelwa dithuto tša kgakollo.
Mokgekolo yo wa mengwaga ye 70, Matshwene Mphela, ke morutiši ka mangwalo yo a nago le boitemogelo bja go nopela. O humane lengwalo la Diploma ya borutiši Kholetšheng ya Thuto ya Sekhukhune. O amogetše tikrii ya Bachelor of Education (B.Ed) Yunibesithing ya Potchefstroom. Gape o ithutile thuto ya Saekholotši (Psychology) Yunibesithing ya Afrika Borwa (Unisa). O feditše mengwaga e mentši e le morutiši wa kgakollo (remedial teacher) fao a bego a thuša bana bao ba swarago bothata go kwešiša dithuto ka sekolong.
Leeto la Mphela le thomile ka 2016 ge a hloma Matshwene Remedial Centre (MRC) fao a bego a diriša boitemogelo bja gagwe go thuša bana bao ba nago le mathata ka dithuto tša sekolo. O re go hlokomela bana, kudu ka go ba thuša ka dithuto tša sekolo, e dutše e le tlhotlo (challenge) e kgolo setšhabeng. Ka lebaka la barutwana ba bantši ka mephathong le taba ya gore ka tlhago ya bona bana ba bangwe ga ba sware dithuto tša ka sekolong ka pele, bana bao ba sa swarego dithuto ka pela, ba kopana le mathata. Bontši bja batswadi ga bo kgone go thuša bana ba bona ka dithuto tša ka sekolong ka ge le bona batswadi ba sa kwešiše dithuto tšeo. Se se tllogela bana ba le kgakanegong yeo e dirago gore ba šalele dithutong tša bona. Mo ke fao MRC e tsenago gona ka go gakolla bana ba babjalo.
Matshwene o re bontši bja bana bao a ba thušago ba tšwa malapeng a go hlaka. Bothata bja gagwe bjo bogolo ka bana ba go palelwa go lefa R150.00 ya kgwedi ka kgwedi ya go rutwa diiri tše tharo matšatši a mahlano a beke. Madimabe ke gore ga a kgone go humana bathekgi ba mašeleng bao ba ka thekgago boitekelo bja gagwe. Batswadi ba bantši ba tshepile senthara ya gagwe go thuša bana ba bona ka go ba gakolla ka dithuto tša sekolo.
Yo mongwe wa barutwana bao a ba thušago, Bokang Makofane, go tšwa motseng wa baagišane wa Bothashoek o re: “RMC e re thuša go kaonafatša bokgoni bja go ngwala, go bala le go rarolla dipalo tša Mmetse. Gape e re thuša gore re be le boitshepo ka mo go rena,” a realo ka ditebogo. Go humana ditaba ka botlalo ka senthara ye, motho a ka leletša Matshwene go 060 419 7018.
