Se se tla ka morago ga pego (report) ya magato a kgalemo go tšwa go dipoelo: 31 tša 2023/2024 tša Mošireletši wa Setšhaba ka morago ga dinyakišišo go dikgonono tša merero ya taolo ya go se sepetšwe gabotse (maladministration) le boitshwaro bja go se be botse nakong ya ge go thwalwa bašomi ba Tlhokomelo ya Baswa (Youth care workers) le baetapele ba bahlokomedi ba bana le baswa (Child and youth care team leaders) go la Polokwane Welfare Complex le Mavambe Secure Care Centre.
Dipoelo tše di tla ka morago ga gore mongongoregi a romele dingongorego tša gagwe ka sephiring go kantoro ya Mošireletši wa Setšhaba ka kgwedi ya Hlakola 2021. Dipoelo tšeo di hweditše gore ba bangwe ba bašomi kgorong ye gammogo le Hlogo ya Kgoro ba amega ditirong tše mpe mme magato ao a nyakegago a swanetšwe go tšewa nakong yeo e beilwego.
Dipoelo di laetša gape gore go na le ditshepedišo tša Kgoro tšeo di sa sepedišanego le tšeo di nyakegago, kudu ge go thwalwa ba bangwe ba bašomi ka ge ba be ba se na mangwalo ao a nyakegago.
Dinyakišišo tšeo di hweditše gore bašomi ba 18 bao ba thwetšwego ba be ba se na mangwalo ao a nyakegago ebile ba be ba sa swanela go kgethwa, go hlokolwa le go dumelelwa go thwalwa go tloga mathomong.
Mmoleledi wa mmušo wa profense, Ndavhe Ramakuela, o re mmušo wa bona o ela dipoelo tše tlhoko mme o ikemišeditše go swarelela meeno ya pušo ye botse ya serithi mešomong ya wona ka moka.
“Ge re fetola ditšhišinyo tša Mošireletši wa Setšhaba, mmušo o tshepedišong ya go phethagatša magato ka moka mo nakong yeo e beilwego ya matšatši a 120,” a realo.
Ramakuela o re magato ao a akaretša go lebeledišiša mešomo ka moka yeo e sa sepetšwago gabotse mme gwa tšewa magato a maleba go maloko ao a akareditšwego ka gare ga dipoelo.
“Mmušo o ikemišeditše go netefatša gore dikgoro ka moka le makala a tšona di latela melao ya tshepedišo ya merero ya setšhaba le ditirelo. Mmušo o ikemišeditše go phošolla mathata ka moka, wa netefatša gore mathata ao ga a sa direga gape,” a realo.
Dudu Setlatjile o kgethilwe bjalo ka Hlogo ya Kgoro ya motšwaoswere mme o letetšwe gore a tšwele pele go phethagatša magato a maleba a kgalemo go maloko ao a amegago.
“Re ile go kwalakwatša tshedimošo yeo e nyakegago ge ditshepedišo di fihlile mafelelong,” gwa realo Ramakuela.
