MOKANE MALATJI
POLOKWANE: Banamedi bao ba lapišitšwego ke mathata a go se fele a dipase tša Great
North, ba lla sello se tee sa go re ‘Khamphane ya Great North Transport (GNT) e a re tlaiša’. Bontši bja bona bo re khamphane ye ya dipase ga e dumele gore e a phuhlama. GNT ehlomilwe ka 1996 ka morago ga go kopanya Gazankulu Transport (Pty) Ltd, Far North Transport Services le Lebowa Transport. Khamphane ye e thekgwa ke mmušo ka mašeleng gore e kgone go šoma. Potšišo ke gore naa khamphane ye e reng e na le mathata a go se fele? A naa go reng ditirelo tša yona di fokola mola dipase di le gare di nametša batho?
Go be go se bose ka nako ya ge banamedi ba be ba ntšha sa mafahleng a bona. Nnete ke gore banamedi ba ferekane, ba thuntšha muši ka dinko. Yo mongwe wa banamedi yoo a
kgopetšego go ba Tlhokaina o rile:
“Re theeletša tshwantšhetšodikgao ya Mahlakung re dutše ka mo renkeng, re letile go se na nko yeo e tšwang lemina, re beile mokganya phatleng ka leswiswing. O a bona mabone a a Apollo ao a lego ka mo renkeng – ga go na le la go tuka! Ke leswiswi feela ge le phirimile kamo renkeng. Re dudišwa ke tshotlego yeo GNT e re hlolelago yona eupša ga se gwa bolokega ebile re bolawa ke phefo re dutše fa.”
Mosadi yo mongwe gape wa Tlhokaina yoo le yena a bego a fufuletšwe o rile: “Ke tšhaiša mošomong ka 13h30, ka kitimela renkeng go namela pase ya 14h00. Manyami ke gore ke tla ba ka tla ka namela pase ya 18h00 mathapama ka gore go se na le pase le e tee yeo e tla bego e tlile go re lamolela. Ka nako yeo ya 18:00 re a namela ra tlala pshii, ra feta palo ye e dumeletšwego ka paseng ka gore re na re le ba bantši. Lebaka ke gore go tla be go swanetšego ba go fetile dipase tše nne tšeo di paletšwego go tla, ka gona palo ya banamedi ya oketšega.
“Taba e bohloko ke gore balaodi ba dipase ga ba bolele le rena selo ge go na le mathata goba diphetogo. Se se šupa gore ga ba iše felo ka rena. Ba re re tla ba ra loga maano eupša ge re reka dithekethe tša kgwedi goba tša beke, tšhelete ya rena ba e tšea ka moka e feletše. Mola re rekile dithekethe, dipase ga di be gona, ke moka ra thoma ra itshetšha go namela dithekisi”.
Yo mongwe wa banamedi bao ba hlobogilego o re yena o kgaogana le GNT. Go tloga gabjale o tla inamelela tše dingwe dinamelwa. Yena le ba bangwe ba theile dipase tše leina ba re ke ‘Dipase tša Muvhango’. Monamedi yo mongwe o re o lapišitšwe ke go kgorometšana le go pitlagana mola a letela dipase nako e telele. Banamedi ba lla gape ka seemo sa dipese tšeo di rathafetšego. Gape ba re dipase di phelela go šarelwa mme ba fihla mešomong ka morago ga nako. Ba re ba tšhogela polokego ya bona ka ge ba phela ba swere dipelo ka diatla.
Mmoleledi wa GNT, Mna Leo Gama, o iphetoletše ka go re: “Re ka bolela ka boikgantšho gore GNT e beile taba ya go hloka dipase tša maleba ntlhoraneng ya dinepo tša yona. Mo nakong ye, re feleletša peakanyo ya rena ya go reka dipase tše diswa mola re tšwela pele go tsošološa tša kgale gore di bowe tseleng. Morero wa go matlafatša ditsela o tšwela pele kotareng ye mme o tla tšwela pele le kotareng yeo e tlago. Go feta tšohle, banamedi ba rena ke bona re ba beilego pele gomme re tla dira tšohle maatleng a rena go kgotsofatša dinyakwa tša bona”.
