“Diphatišišo tša rena di dirilwe Madimbo corridor tikologong ya Mutale fao di bego di ama balemi ba 294 ba basadi le baswa. Tikologo ye ke ya go hloka pula mola e na le go fiša kudu fao e šitišago tšweletšo ya temo. Diphetogo tša leratadima di ama balemipotlana ba mananeo a nošetšo thwii le bokgoni bja bona bja go iphediša ka temo. Phetogo ya leratadima e na le khuetšo go mohuta wa dimela wo o ka bjalwago ka tlase ga mabaka a go fapana. Ka lebaka la go se tsebe, balemi ba bantši ga ba kgone go fetola mekgwa ya bona ya temo go sepelelana le phetogo ya leratadima. Go palelwa ke go fetola mekgwa ya go lema go sepelelana le diphetogo tša leratadima go ka hlola tobo e kgolo ya mašeleng le koketšego ya dikgoba tša mediro kudu ditikologong tša magaeng.
“Diphatišišo di laeditše gore le ge ba bangwe ba sa lemoge bogolo bja diphetogo tša leratadima, bontši bja balemi ba Madimbo corridor ba lemoga diphetogo tšeo di lego gona tša leratadima le khuetšo yeo diphetogo tše di nago nayo go tšweletšo ya temo. Magareng ga tše dingwe, phetogo ya leratadima e oketša palo ya diji tšeo di jago dimela goba tša hlola malwetši ao a amago tšweletšo gampe. Bontši bja pula bo ama tšweletšo ka ge bo hlola komelelo goba mafula ao a gogolago dimela goba mobu mme ka go dira bjalo tšweletšo ya amega gampe. Katlego ya mananeo a nošetšo e laolwa ke bogolo bja pula bjo bo amago bontši bja meetse ao a lego gona ka matamong le didibeng ao a ka dirišetšwago merero ya nošetšo,” Prof Nesamvuni a realo ge a tšwela pele.
“Khuetšo ya phetogo ya leratadima ga esale selo seo se kago tshedišwa mahlo go tšweletšo ya temo. Temogo le kamogelo ya khuetšo ye e thuša balemi go kgetha dibjalo tša maleba tšeo di swanetšanago le diphetogo tša leratadima tšeo di letetšwego. Diphetogo tše di dirile gore balemi ba fetole dibjalo tšeo ba bego ba tlwaetše go di bjala bjalo ka lefela, dinawa le dipotata mme ba leke dibjalo tše diswa bjalo ka tamati, butternut le sebjalo sa ‘occra’ seo e lego se seswa. Temogo ya diphetogo tša leradima e dirile gore balemi ba fetole mekgwa ya bona ya go diriša menontšha (manyora), taolo ya diji tša dibjalo le mekgwa ya tsheketšo ya meetse. Meetse ao a lego gona ka dinako tšohle a nyakega go merero ya bophelo bjalo ka go nwa, go apea le go hlatswa. Go aroganya meetse go merero ye ka moka go nyakega tlhokomelo le tirišano magareng ga batho gore meetse a kgone go lekana merero ya bophelo ka moka go akaretšwa le tšweletšo ya temo.
Basadi le baswa ba dinagamagaeng ba bapala karolo e bohlokwa go morero wa go godiša ekonomi ka tlase ga mabaka a mathata a go hloka thekgo e botse. Bjalo ka batho bao ba lebanego le morero wa go godiša bana goba go itlholela mediro, basadi le baswa ba bapala karolo e kgolo ya go direla bana ba bona dijo, go hlola dikgoba tša mešomo le go godiša ekonomi,” gwa realo Nesamvuni.
