MOKANE MALATJI
MOOKGOPHONG-MODIMOLLE: Bagologolo ba re go anegelwa ke go tingwa … go bona go swana le go ja – ga di direlanwe. Dilo tše dingwe ga di hlalosege ka mantšu … di nyaka ge motho a iponela tšona ka mahlo a gagwe ka gore mantšu ga se a lekana go hlalosa dilo ka moka tšeo di diregago ge batho ba thabiša ba bangwe. Batho ba khora dilo tšeo ba di lebelelago le go di bona ka mahlo a bona ka gore ba kgona go iponela le go ikwela dilo ka moka tšeo di diregago sammaletee ge batho ba bina goba ba opela. Bošego bja 22 Phato 2024, batho ba ile ba ipshina ka go ja mmino wa setšo ba ba ba nwa le moro wa wona.
Sehlopha sa motswako sa makgarebe le masogana se ile sa ruthetša holo ya ditiragalo ka mmino wa go phophoma maatla, mafolofolo, mathaithai le bothakga bja mmino. Ka mapešana a bona a mmala o motsothwa ao a thalagantšwego ka mebala e mešweu, ka mašaphušašapho kua merumong …mafelelong a wona, botse bo ile bja bonwa ke babogedi. Go tabogela moyeng, go thinya le go šikinya matheka e be e le tšona tša batho ba madi a maswa a go fiša …batho bao ba tletšego bophelo le mafolofolo. Moyana wa go hlabahlaba wo o bego o leka go tsena ka mabati o ile wa lemoga ka pela gore go tšwa ka madi ga go botse gomme wa re thee! Gatee fela holo e ile ya tlala maatla, mafolofolo le boruthwana bja seruthwane.
Ba re ge ba tla go kgahla masogana le makgarebe, e be ge ba bina ka babedi, ka babedi …ba bina ka la mmušo ba se ba apara dieta … ba tabogela moyeng, ba buša ba bina ba eya pele ba lebelela ka thoko yela … ba lebelelana … ba lebelelana ba lebelela thoko yela ba bintšha matheka ka mokgwa wo le wena o tlago kgahlega. Ke moka ba bina ba iša motsogo moyeng …ba fošetša maoto pele le morago …thoko ye le thoko yela pele ba šikinya melala ba lebelelane ka mahlong ba dikologana!
Ge o sa re ke tšona, ba tla bina ka go šielana ka yo tee ka yo tee, mongwe le mongwe a ntšha meragelo yeo a tumilego ka yona. E be e le taba ya go tabogela moyeng… taba ya go phetlaganya maoto… taba ya go tabogataboga…taba ya go bintšha matsogo le taba ya go thinya le go roba letheka – o rata bjang!
Dilo tše dingwe ga di hlalosege ka mantšu … mantšu a hlaelela go hlalosa ka mokgwa wo di diregilego ka gona ka lebaka la gore go direga dilo tge batho ba bina le ge ba opela, go direga molokoloko wa dilo tše dintši tša go fapana ka nakwana e kopana fao o ka se kgonego go di hlalosa ka botlalo ka mantšu. Bagologolo ba rerešitše ge ba re go anegelwa ke go tingwa. Ge e le rena bao re bilego dihlatse tša go phela tša tiragalo yeo, ka fao re ipshinnego ka gona, re ile ra fetša ka go phaphatha moya ka diatla ra ba ra o atla ka melomo…
