GASEKGOPO: Dikgogakgogano di phatlogile magareng ga badudi ba GaSekgopo le
boetapele bja Masepala wa Greater Letaba nakong ya kopano ya Leano la go Kgomagana la
Tlhabollo (Integrated Development Planning (IDP)) ge badudi ba be ba sola baetapele ka go
palelwa ke go ba abela ditirelo tša motheo. Kopano yeo e fetogile sefala seo badudi ba ilego
ba tšweletša dingongorego tša nako e telele mabapi le seo ba se hlalosago bjalo ka
tlhokomelo e nnyane le ditshepišo tšeo di sa phethagatšwego.
Badudi ba boletše gore ba phetše dibeke tše mmalwa ba se na meetse ao a tshepagalago mola
maemo a mebila a sa loka, a tšwela pele go šitiša maphelo a bona a letšatši le letšatši. Mebila
ya mabu ga e sepelege ge pula e nele kudu e lego seo se amago go fihlelela dikolo, dikliniki
le menyetla ya ekonomi.
Phetole Motupa o boletše gore go diega ga diprojeke tša mananeokgoparara go gwahlafaditše
maemo go ya pele. “Karolo ya mathomo ya projeke ya go aga tsela go tloga R81 go ya
Mošate e thomile mengwaga yeo e fetago lesome eupša le bjale ga se ya feletšwa. Ga go na
tlhathollo ka karolo ya bobedi gomme tsela e senyega go feta pele,” a realo.
Badudi gape ba sola masepala ka go beya Ga-Sekgopo ka thoko mananeong a tlhabollo. Ba re
diprojeke tšeo di bego di reretšwe motse wa bona, di išwa mafelong a mangwe. Ba bangwe
ba boletše ka go hloka mekgwa ya go thwala bašomi ya maleba.
“Re gapeletšwa go dira dikgopelo tša mešomo yeo e šetšego e filwe batho ba bangwe. Go
bonagala eka go tšea karolo ga rena ke go ikgakantšha feela,” gwa realo modudi yo mongwe.
Badudi ba rile mathata a a bontšha mengwaga ya go hlokomologwa gomme dingongorego tša
bona tšeo ba di tšweletšago dikopanong ga di fetoge selo. “Go na le malapa ao a fetšago
dibeke a se na meetse gomme ge pula e ena, mebila ga e šome. Se se ama mošomo, sekolo le
bophelo bja letšatši le letšatši,” gwa ralo modudi.
Meyara Dagma Mamanyoha o ganeditše ditatofatšo tša gore masepala o hlokomologile motse
wa GaSekgopo. O laeditše diprojeke tše mmalwa tšeo di šetšego di dirilwe, go akaretšwa
mohlagase, mebila, meetse, holo ya setšhaba le lefelo la dipapadi.
“Ga se nnete gore ga re tšeele setšhaba se hlogong. Re dirile tšeo di kgopetšwego. Badudi ba
swanetše go bolela ka go lebanya seo ba se nyakago gore re kgone go araba,” a realo.
Mamanyoha o boletše gape ka mananeo a thekgo, go akaretšwa dithušo tša dithuto go
barutwana le thušo ya dikotsi tša masetlapelo bjalo ka dijo, dikobo le ditulo tša go thetha tša
bagolofadi.
Le ge go le bjalo, badudi ba phegile ka go re tšeo ga di rarolle mathata a mananeokgoparara
le go se tshepagale ga ditirelo.
Meyara o dumetše gore go na le tlhokego e kgolo ya mešomo, kudukudu go baswa. “Tekanyo
ya tlhokego ya mešomo go bona e ka ba 59%. Go na le dikgoba tšeo di ka bago 15 feela ka
masepaleng, ka fao menyetla ke ye mennyane,” a realo.
Le ge go le bjalo, badudi ba tšwela pele go re mekgwa ya go thwala ga e kgotsofatše ebile ga
e pepeneneng.
Mamanyoha o hlohleleditše badudi go lebelela tlhabollo ya nako e telele, a lemoša ka go gana
boitapišo bja mmušo ka moka. “Baetapele bao ba kgethilwego, ba šoma ka nako yeo e
lekanyeditšwego gomme ba bangwe ba tla tšeya marapo nakong yeo e tlago,” a realo.
