Se se direga nakong ya ge badudi ba tšwela pele go hlaela kabo ya ditirelo. Mmoleledi wa mašeleng a profense mokgatlong wa DA, Lindy Wilson, o re go gononwa gore Kgoro ya Thuto e bušeditše R523.3 milione, ya Maphelo ya boetša R570.5 milione, Dikgoro tša Mešomo ya Setšhaba, Ditsela le Mafarahlahla ya bušetša R226.1 milione mola ya Temo e bušeditše R98.7 milione.
“Kgoro ya Tlhabollo ya Leago e boeditše R72.4 milione, Lekgotlatheramelao la bušetša R45.1 milione, Dinamelwa le Tšhireletšo ya Setšhaba ya bušetša R40.7 milione, kantoro ya Tonakgolo ya bušetša R16 milione, ya Mašeleng ya bušetša R14 milione gomme ya Tlhabollo ya Ekonomi, Tikologo le Boeti ya bušetša R8.4 milione,” a realo.
Wilson o re mašeleng a nkabe a šomišitšwe go matlafatša dikolo, dipetlele, dikliniki, go thuša mananeo a tlhabollo ya leago le go šetša meago le mathata a tlhokego ya mešomo. O re ba ile go ngwalela Tonakgolo Chupu Mathabatha lengwalo go hwetša tshedimošo ya go tlala seatla.
“Re tshwenywa ke go nanya ga go šomišwa ga mašeleng ao a swanetšego go šomišwa go matlafatša profense ka go thuša go lebelelana le mathata ao dikgoro di hlakanago le wona,” gwa realo Wilson.
O re go palelwa go šomišwa ga mašeleng ao a lego gona ga go amogelege mme e ba bjalo ka ntahle difahlegong tša badudi bao ba tšwelago pele go hlaka ka lebaka la tlhokego ya ditirelo.
Mmoleledi wa mmušo wa profense Ndavhe Ramakuela o re mmušo ga se o bušetše morago mašeleng ao DA e bolelago ka wona.
“Nakong ya ngwaga wa mašeleng wa 2022/23, mmušo o bušeditše morago R122 milione feela go Kgoro ya Mašeleng ya naga go tšwa go lenaneo la Welisizwe Rural Bridges le diprojeke tše dingwe tše nnyane mme se se dira 0.15% ya tekanyetšo ya mašeleng a profense yeo e fetago R70 bilione,” a realo.
Ramakuela o re go se šomišwe ga mašeleng a 2022/23 e bile 1.9% ya tekanyetšo ya Kgoro ya Mašeleng ya naga yeo e lego ka gare ga 2% yeo e dumeletšwego mme se e bile kaonafalo go tšwa go 2021/22.
“Profense e šoma gabotse mabakeng a tšhomišo ya tekanyetšo. Ke ka fao e hweditšego tlaleletšo ya R250 millione ngwaga wo go tšwa go sekhwama sa bodulo bja batho (human settlement grant),” a realo.
