MOGALE SEKWELA
Motse wo o na le mothopo o tee wa meetse wo o dutlago efela o kgona go swara meetse ao a fetago. Meetse ao a tšwa nokeng ya Motse moo go agilwego letamo ka gare ga noka ye. Badudi ba re gabjale bothata ke gore letamo leo le agilwego le tletše maraga mme se se šitiša motšhene wa go pompa meetse go pompa meetse.
Caiphus Molekoa (53) o re mothopo wa bona o omile ka ge letamo le tletše maraga. “Bothata bja go re palediša go hwetša meetse ke leraga feela mme ga go na yo a ikemišeditšego go re thuša. Go na le khamphane yeo e nago le didirišwa tša go ntšha maraga ao efela makomiti a wate le mokhanselara ga se ba ikemišetše go thuša,” a realo.
Badudi ba re go bonagala okare maloko a komiti ya meetse ga a na maatla a go dira selo ka ge go se na seo se diregago.
“Go na le dikgonono tša gore makomiti a wate ga a nyake go dira selo ka seemo se ka ge a holega go bao ba rekišetšago badudi meetse. Mokhanselara o homotše ka taba ye,” gwa realo modudi (36).
Ba re ga ba sa bona bohlokwa bja go kgetha ka ge ba lahlegetšwe ke tshepo go boetapele bja bona bja dipolitiki ka gore ga ba kgathalele maphelo a bona.
“Ba šomela bona feela gomme ba lebala rena bao re hlakago. Ke mohola ofe wa go kgetha re sa bone meputso ya gona? Baetapele ba rena ga ba na mohola,” gwa realo Simon Moreroa (40) ka pefelo.
Motse wo o na le melete ya meetse ye mmalwa yeo e borilwego efela ga e šome. Modulasetulo wa selete sa Sekhukhune mokgatlong wa Build One South Africa (BOSA), Terrence Phala, o re go a nyamiša gore badudi ba sa gapeletšega go phela ka gare ga seemo se sa go šiiša sa tlhokego ya meetse moo ba gapeletšegago go ithekela wona.
“Motse wo o lebetšwe ka gore ga o hwetše le lori ya go ba abela meetse. Re ile go lwa go netefatša gore baetapele bao ba tšwafago ba abela badudi meetse a go hlweka,” a realo.
Mmoleledi wa masepala wa selete sa Sekhukhune, Lemson Moropjane, o re ba dira dinyakišišo le go bona gore ba ka thuša badudi ba motse wo ka meetse ka pela bjang.
