Nakong ya tsebišo ya maikemišetšo a sehla se go la Polokwane ka Labone la 15 Phupu 2023,
Molekgotlaphethiši wa Kgoro ya CoGHSTA, Basikopo Makamu, o boletše gore profense ya
Limpopo e komana-madula-e-bapilwe go sehla sa dikoma sa go hloka mahu.
Ngwaga wo, profense e hweditše dikgopelo tša dikoma tše 644 efela go dumeletšwe feela tše
587 mo e lego gore tša banna ke tše 328 mola tša basadi e le tše 259.
Selete sa Sekhukhune se di goga pele ka dikoma tše 285 tšeo di dumeletšwego, gwa latela
Capricorn ka 127, Waterberg ka 84, Mopani ka 51, gwa felela ka Vhembe ka 40.
Molekgotlaphethiši Makamu o re ga go na motho yo a swanetšego go thoma koma ntle le
tumelelo ebile ga go na ngaka ya setšo ya lebollo goba motho mang kapa mang yo a
dumeletšwego go phetha merero ya koma ntle le setifikeiti sa tumelelo ya go phetha merero
yeo.
“Ga go na ngwana wa mengwaga ya ka fase ga 12 yo a swanetšego go ya komeng mme ga go
na motho yo a swanetšego go tšewa ka kgang go išwa komeng,” a realo.
Makamu o boditše Seipone gore ba ile go netefatša gore maphelo a dialoga a šireletšegile
ebile ga ba ye go tlogela batho ba thoma dikoma ntle le mangwalo a tumelelo.
Nakong ya pulo ya Ntlo ya Magoši, Tonakgolo, Chupu Mathabatha, o hlohleleditše sehla se
sa dikoma gore se šomišwe go ruta boikarabelo le go tsošološa bodulo bjo bo hlasetšwego ke
tshotlo ya basadi le bana.
“Re kgala ka bogale, kudu ba seleteng sa Sekhukhune, bao ba tlago go leka go thoma dikoma
tšeo di sego molaong. Ga re ye go senya palo ya rena e botse ya go sepediša dikoma tša go
hloka mahu ka batho bao ba kitimišago mašeleng,” a realo.
Benny Mofokeng (16) o re o fela pelo ya go ya komeng. “Ke kgale ke emetše monyetla wo
wa go sepela tsela ya go tsena bonneng,” a realo ka lethabo.
