MARAPONG, Lephalale: Limpopo Exxaro Resources e thakgotše ngwaga wa 2025 ka
mokgwa wa makgethe wa go dira peeletšo ya go ja dimilione Sekolong sa Praemari sa
Nelsonskop lekheišeneng la Marapong. Peeletšo e akaretša diphapoši tše diswa tša borutelo
tše nne (4) le holo ya sekolo. Sekolo se se kgauswi le moepokgoparara wa khamphani ye wa
malahla wa Grootgeluk mo Lephalale. Peeletšo ye ke karolo ya morero wa khamphani ye wa
Leano la Mošomo le Leago (Social and Labour Plan goba SLP) le maitekelo a yona a go
phagamiša le go matlafatša ditšhaba tšeo moepo o hlomilwego go tšona ka go šogana le
dikgala tše bohlokwa tša tšhalelonthago go ya ka mošito wa dikokwane tša leago.
Projeke ya Nelsonskop, yeo e lekanyetšwago go R7 milione, e emetše peeletšo ya go bonala
go bokamoso bja baswa mme e letetšwe go hlola menyetla e meswa go thuto le tlhabollo ya
setšhaba tikologong ya Lephalale. Go feta fao, peeletšo ye go mafarahlahla a meago e
nepilwe go hlola tikologo ya go bolokega yeo e nolofaletšago barutwana go ithuta, go dira
dilo le go phadima dithutong. Magato a a phagamiša bohlokwa bja tirišano magareng ga
makala a setšhaba le a praebete.
“Bjalo ka khamphani, re dumela gore thuto ke motheo wa diphetogo le tlhabologo. Ka lebaka
leo, ka go aga diphapoši tše le holo ya sekolo, ga re thekge feela barutwana gore ba kgone go
fihlelela ditoro tša bona eupša gape ke go tsenya letsogo go tlhabologo ya nako e telele ya
setšhaba seo e lego baamogedi ba rena. Re kwešiša gape gore re ka se kgone go dira se re
nnoši gomme ka lebaka leo re leboga tirišano ya rena le Kgoro ya Diminerale le Methopo ya
Petroleamo, Kgoro ya Thuto le Masepala wa Lephalale go re thekga go phethagatša projeke
ye ya boteng (boleng) bja godimo. Re a amogela gore lefaseng la lehono, dipoledišano
magareng ga bakgathatema di nyaka tirišano go fihlelela dinyakwa tša ka pela tša setšhaba,”
gwa realo Riaan Koppeschaar yo e lego Molaodiphethiši wa Motšwaoswere wa Exxaro.
Sekolo sa Praemari sa Nelsonskop se magareng ga dikolo tše 25 tikologong ya Lephalale tšeo
di kgomaganego ka inthanete ka Wi-fi yeo e loketšwego ke Exxaro. Se se dirwa go fihlelela
dinyakwa tšeo di fetogago ka lebelo tša theknolotši yeo e šikinyago dilo le go gokara
ditharollo tša go makatša tša nako ya titšithale.
“Bjalo ka badirišani ba leago intasetering ya meepo, re na le boikarabelo bja mohlakanelwa
bja go gapeletša le go obamela tlhabollo le phethagatšo ya SLP go phagamiša boiketlo bja
leago le bja ekonomi bja Maaforikaborwa ka moka. Ka go dira bjalo, ditšhaba tšeo di
amilwego ke meepo le ditikologo tšeo di romelago bašomi, di swanetše go holega ka fao go
bonalago go mediro ya meepo le mahumo a diminerale a naga,” gwa realo Motlatšatona wa
Diminerale le Methopo ya Petroleamo, Phumzile Mgcina nakong ya ge a bolela.
