MMEGI WA SEIPONE
Diphatišo di laetša gore bontši bja bana ba Maafrika ga bo kgone go bala ka kwešišo dilo tše
bonolonolo tšeo di ngwadilwego ka maleme a bona a letswele. Boteng (boleng) goba
khwalithi ya thuto e ithekgile ka bokgoni bja go bala ka kwešišo. Motheo o mokaone wa go
kgona go bala ka kwešišo go bontši bja batho lefaseng, ke go kgona go bala ka leleme la
letswele. Na ge barutwana ba sa kgone go kwešiša dilo ka segagabobona, na go ka thwe thuto
ya bona ke ya boteng (boleng) goba ya khwalithi? Karolo ya bothata bjo barutwana ba
Maafrika ba lebanego nabjo mabapi le segagabobona ke gore ga go na selo bophelong bja
bona seo se ngwalwago le go phatlalatšwa ka maleme a Afrika. Go se ngwalwe ga maleme a
go dira gore batho ba lahlegelwe ke mareo goba maina a dilo tša go fapafapana bophelong.
Mehleng ya lehono, bontši bja bana bo tseba dilo – diphoofolo, dimela, didirišwa le dilo tše
dingwe ka mareo goba maina a Seisimane mola ba sa di tsebe ka segagabobona. Bana ba
tseba ‘lion’, ‘tiger’ le ‘elephant’ mola ba sa tsebe ‘tau’, ‘nkwe’ le ‘tlou’. Mmušo o lemogile
bothata bjo mme o hlomile dihlophatšhomo go swarana le mošomo wa go hlama le go boloka
mareo a maleme a Afrika. Sehlophatšhomo sa leleme la Sesotho sa Leboa / Sepedi se ya go
fetša beke ya 13 – 17 Diphalane (Oktoboro) 2025 hotelengtsoko mo Polokwane se
kgoboketša mareo ao a lego gona le go hlama mareo a maswa a diphoofolo le dimela.
“Nepokgolo ya rena ga se go hlama mareo a maswa fao re nago le mareo a setšo ao a bego a
dutše a dirišwa. Re nepile go kgoboketša mareo goba maina a mehlare le diphoofolo tša go
fapafapana ao a lego gona a bile a tsebja le go dirišwa ke batho. Fao re hlokago mareo a
maleba a segagaborena, re tlamegile go hlama mareo a maswa gore maleme a rena a kgone
go gola le go hlabologa,” gwa realo Mdi Mokgadi Mathole yo e lego mohlami wa mareo a
leleme la Sesotho sa Leboa / Sepedi.
Ge batho ba bolela, ba diriša mareo go šupa dilo tša go fapana bophelong. Ge batho ba hloka
goba ba sa tsebe mareo a maleba a dilo tšeo di fapanego bophelong, poledišano e ba e thata.
Modiro wa sehlophatšhomo se ke go nolofaletša baboledi ba leleme le bophelo ka go
tšweletša le go phatlalatša mareo a dilo ao a lego gona ka segagaborena mola se hlama mareo
a maswa fao mareo a hlokegago ka nepo ya go kgontšha nna, wena le baboledi ba leleme le
go kgona go le bolela ka lerato, lethabo, kwešišo le ka boikgantšho.
