“Bjalo ka mokhanselara wateng ye ya 27, ke bone go le bohlokwa go abela badudi ditofo tše
ka ge di tla ba thuša kgabagareng ya kgaotšo ya mohlagase le marega. Mpho ye ke karolo ya
kabo ya ditirelo go setšhaba sa gešo, kudu batho bao ba diilago kudu. Re nagana gore ditofo
tše le tla tliša kimologo go badudi ba mahlatse bao ba di humanego. Seo se kgahlišago le go
feta ke gore ditofo tše di seketša dikgong kudu ebile di bolokegile kudu,” gwa realo
Mokhanselara Rufos Mothabini.
Khamphani ya go bitšwa Rocket Works yeo e tšweletšago ditofo tše e re ditofo di tiile ebile
di bolokegile ka ge, magareng ga tše dingwe, ditšhipi tša ditofo tše tša ka ntle di phela di
fodile le ge mollo o tuka. Khamphani ye e tšwetše pele go sengwalwa ya bontša gore ditofo
tše di tuka ka pela le gona gabonolo mola se kgona go bediša meetse a dilithara tše hlano ka
Metsoso ye lesomehlano ka mašašana a go imela 250g feela.
Yo mongwe wa badudi bao ba amotšeng ditofo tše, Annikie Makhura , o re: “Seo ke se
ratang ka setofo se ke gore ke se sennyane. Go bonolo go se kuka le ge se tuka ebile ke nnete
gore se šomiša dikgong tše nnyane. Ge e le go se šomiša gona, aowa, go bonolo go feta go
gotša mollo fase. Re leboga mokhanselara ka go bona go le bohlokwa go re fa ditofo tše efela
se ga se sa swanela go ba e le leano la go go tšwela pele ka kgaotšo ya mohlagase. Re
holofela gape gore ka ge go thomilwe ka ditofo, go tla latela diRDP,” a realo ka kholofelo.
Mokgwa wa go šomiša setofo se:
Kgato ya mathomo: O phutha pampiri wa e šušumetša ka gare ga molomo wa setofo mme
wa e gogela godimo
Kgato ya bobedi: O lokela diphatana le mašašana ka gare ga molomo wa sefoto mme wa
tšhuma pampiri le diphatana go gotša mollo.
Kgato ya mafelelo: Oketša diphatana le mašanaš gore mollo o tielele go fihla ge meets a
bela. Ge o feditše, o tla tšholla molora.
Go ya ka batšweletši ba sefoto se, yo a se šomišago ga se a swanela go se tima ka meetse ka
ntle le ge e le ka tlase ga mabaka a tšhoganetšo. Gape motho o swanetše go hlokomela kudu
ge a apea ka makhura gore a se tšhologele godimo ga setofo.
