Dipalopalo tše di be di lebeletše bosenyi go tloga ka la 1 Pherekgong 2023 go fihla ka la 31
Hlakola 2023. Hadebe o re dipolao tše 53 go tšwa go tše 249 di hlotšwe ke go hlaselwa ke
setšhaba ka seboka.
Dipalo di ile godimo ka 13.7% ge go bapetšwa le kotara ya go feta mme ditlhaselo tša seboka
di amilwe kudu go kakaretšo ya dipalo, gwa latela ke dingangišano goba go se kwišišane
goba go rumolwa fao go nago le melato yeo e fihlago go 58.
“Dikarolo tše tše pedi di amile kudu melato ye 111 go tšwa go ye 249. Ntle le dikarolo tše,
nkabe re na le melato ye 138,” a realo.
O re ba kgonne go golega bagononelwa ba 125 melatong ya dipolao le ba 89 melatong ya
maitekelo a polao.
“Go molaleng gore go dipalopalo tše, go nyakega go šoma ka thata go ruta batho ba gaborena
ka letsogo la molao le boitshwaro bja maloko a setšhaba dinakong tša dikgakgano,” a realo.
Profense e bone kgolo ye nnyane ya 6.4% go melato ya thobalano moo bagononelwa ba 254
ba golegilwego. O re ba hweditše phokotšego ya 54% ya melato ya thobalano moo
bahlokofatšwa ba kgomilwego ge molato o direga, phokotšego ya 19% ya melato ya
thobalano ya go ba le dikgobadi (sexual assault) efela gwa ba le koketšego ya 10% melatong
ya go kata moo bagononelwa ba 161 ba golegilwego.
“Go bile le koketšegoo ya 0.3% melatong ya go utswa malapeng, koketšego ya 9.2% ya go
utswa mafelong ao e sego malapeng (non-residential places) le koketšego ya 13.4% ya go
tšewa ga difatanaga ka kgang (car-jacking),” gwa realo Hadebe.
Hadebe o re go utswiwa ga diphoofolo ke tlhobaboroko le ge e le gore go theogile ka 0.4%
moo go golegilwego bagononelwa ba 19. O re ba matlafaditše ntwa ya bona go dithunya tšeo
di sego molaong mme dithunya tše 194 di tlošitšwe setšhabeng.
O boditše Seipone gore go utswiwa ga koporo yeo e lego go dithapo tša mohlagase, go
nyogela godimo.
“Dikgweding tše tharo tša go feta go ngwadišitšwe melato ye 1 451 mme gwa golegwa
bagononelwa ba 63,” a realo.
O re ke nako ya gore ba dire Limpopo lefelo leo le tlago go romela molaetša go mahodu gore
bohodu bo ka se kgotlelelwe.
