Mošate wo o rulagantše moletlo wo go hlompha dikolo tše gammogo le barutwana bao ba šomilego gabotse. Dikolo di hweditše disetifikeiti le megopo ya gore di matlafaditše dipoelo tša tšona. Mmoleledi wa Mošate, Matome Ramohlale, o re ba bone go le kaone gore ba keteke ka ge dikolo tše di dirile gore ba ikgantšhe.
“Dipoelo tša tšona di matlafetše kudu go feta tša mengwaga ya go feta mme di beile motse wa rena mmepeng. Ntle le dimpho tšeo re di abetšego tšona, re hlabile dikgomo tše pedi gore re keteke re ipshine,” a realo.
Nepo ya moletlo e be e le go hlohleletša barutwana ba marematlou ngwageng wo gore le bona ba šome ka thata ge ba nyaka go hwetša tše dibotse. Mohlohleletši ebile e le Modulasetulo wa Sekgopo Rural Development Agency, Mabilu Mokwalakwala, o hlohleleditše barutwana gore ba šome ka thata gore dipoelo tša 2023 di se boele fase.
“Re lebogiša bao ba hweditšego dimpho ebile re hlohleletša barutwana ba ngwaga wo gore ba šome ka thata gore ba matlafatše dipoelo tše go ya pele,” gwa realo Mokwalakwala.
Molaodi wa selete sa Mopani West, Paulina Modika, o re dikolo tše di kgonne go tsentšha dipoelo tša go fihla 38% Seleteng sa bona. “Re selete seo se matlafetšego kudu profenseng ya rena. Ga go na sekolo seo se sa šomago gabotse motseng wo,” a realo ka lethabo.
Batswadi ba hlohleleditšwe go thekga bana ba bona gore ba kgone go šoma gabotse bjalo ka barutwana ba 2023. Kgošigadi Mokgadi Sekgopo o re go swanetše go ba le moputso ka morago ga go šoma ka thata.
“Ke ya thaba ka ge re keteka. Re ile go netefatša gore re matlafatša motse wa rena ka thuto. Re na le tshepo ya gore ngwaga wo o tlago re ile go ya moletlong wa naga wa dipoelo wo o tshwarago ke Tona ya Thuto,” a realo.
Makoma Ramohlale o rothišitše dikeledi tša lethabo nakong ya ge a amogela dimpho tša ngwana wa gagwe, Mokgadi, yo a šomilego gabotse go feta barutwana ka moka motseng wa GaSekgopo.
“Ke ikgantšha ka ngwana waka ka ge a ile a theeletša maele a ka. Gona bjale o kgonne go šoma gabotse mme ke leboga Modimo,” a realo. Sekolo sa Motsheudi se amogetše mpho ya go ba sekolo seo se matlafaditšego dipoelo kudu.
