POLOKWANE: Tonakgolo ya Limpopo, Ngk Phophi Ramathuba, o bontšhitše go tshwenyega ka melato ya dikgorotsheko ya go feta ye 600 yeo e amanago le dingangišano tša boetapele bja setšo profenseng. O kgopetše gore makala a setšo a matlafatšwe gore a kgone go rarolla dingangišano ka ntle le go ithekga ka melato ya dikgorotsheko yeo e bitšago tšhelete e ntši.
Ge a be a bolela moletlong wa dijo tša mantšiboa wa Black Lawyers Association (BLA) go la Polokwane, Ramathuba o boletše gore dingangišano di swanetše go rarollwa ka ditsela tšeo di hlomphago mekgwa ya setšo ya go hlatlamana bogošing, go feta go dumelela maatla a tšhelete go laola sephetho.
O boletše gore tharollo e swanetše go hwetšagala ka gare ga dibopego le mekgwa ya setšo, e sego ka dikgorotsheko moo batho bao ba nago le tšhelete e ntši, ba ka fenyago bao e lego ba maleba.
“Ke kgopela tšhomišano magareng ga mmušo le ditsebi tša molao gore ba tlwaetše baetapele ba setšo go rarolla dingangišano ka khutšo, ka go botega le go latela melao gammogo le ditlwaelo tša setšo,” a realo.
Ramathuba o re mmušo wa profense o šetše o hlahlile baetapele ba setšo dikarolong ka moka tša profense ka ditaba tšeo di fapafapanego, go akaretšwa tšhomišo le taolo ya naga. Le ge go le bjalo, go sa letetšwe go bona ge e ba ba tla šomiša tsebo yeo ba e hweditšego. Tonakgolo o sotše mokgwa wo o golago wa go iša dikgoro tša mmušo kgorotshekong, a lemoša gore melato yeo e tšeyago nako e telele e ka šitiša kabo ya ditirelo go setšhaba.
“Dikhamphane tše dingwe tša boramolao le dikgwebo di atlega ka gobane di dirile melato ya mmušo kgwebo ya tšona e kgolo, go ena le go phadišana le dikgwebo tše dingwe tše maatla. Dikgoro tša Maphelo, Mešomo ya Setšhaba le Merero ya Selegae di dula di lebane le melato ya kgorotsheko,” a realo.
Ramathuba o kgopetše gape gore boramolao bao ba sa thomago mošomo ba swarwe gabotse le go lefša ka tshwanelo. O boletše gore dialoga tša molao ga se tša swanela go tlaišega ka ditšhelete ka gobane meloko ya pele e ile ya itemogela maemo a swanago. “Mmušo wa profense o sekaseka kgonagalo ya go hloma mananeo a profense le a dikgoro a boramolao gore go hlangwe dibaka tše dintši tša mošomo go boramelao ba baso bao ba sa tšwago go thoma,” gwa realo Ramathuba.



