Kgoro e ntšhitše molao wa gore barekiši ba madila ba swanetše go tswalela dikgwebo tša bona ka
12:00 bošegogare profense ka bophara. Se se dirwa ka lebaka la gore botagwa bo oketša tshotlo ya
basadi le bana, go se tšwele pele ga naga, dikotsi mebileng, go phaya thetho ka kgang le tše dingwe.
Gonabjale dikgwebo ka moka tša madila di ile go tswalela gare ga mpa ya bošego. Borakgwebo ba
madila ba befedišwa ke gore dikgwebo tša bona di ile go phuhlama nakong ye e lego go re ba sa leka
go tsoša dikgwebo tša bona ka morago ga leuba la twatši ya khorona.
Bareki ba ngongorega ka gore ba ka se be le nako yeo e lekanego ya go nwa madila. Mong wa
kgwebo ya Samma Liquor Tavern, Quiden Mathebula, o boditše Seipone gore Kgoro e bolaya
dikgwebo tša bona.
Mathebula o re LEDET ga se e ba bolediše ka sephetho se. “Bosenyi bo direga go gongwe le go
gongwe ka nako ye nngwe le ye nngwe mme Kgoro ga se e swanele go iphihla ka morago ga bosenyi.
Kgoro e swanetše gore e išetšane melato go basenyi – rena e re tlogele re le bjalo. Mošomo wa rena
ke go thuša bareki go tloša kgatelelo ya mogopolo. Ge ba re gapeletša gore re tswalele ka 12:00, ba
swanetše go re dumelela gore re bule ka 8 mesong,” a realo.
Ba bangwe ba re se se tlo dira gore go tšwelele madila ao a sego molaong. Tumelo Masenya o re ba
ka se be le nako ya go ipshina ka madila.
“Ga re tsebe gore Kgoro e tlile bjang ka molao wo o amago Limpopo feela. Okare re boela nakong
yela ya dikiletšo tša mesepelo ya Covid-19.
Mmoleledi wa LEDET, Zaid Kalla, o re Molekgotlaphethiši Rodgers Monama o re molao wo o tlo
phethegatšwa ntle le tšhitišo. “Kgoro e swanetše go raloka karolo e kgolo ya go fokotša go nwewa ga
madila le go thekga go nwewa ga madila ka malapeng,” a realo.
Mola go itaetša LEDET e ikemišeditše go phethagatša molao wo o moswa ka 01 Phato 2023 ka
kgopolo ya gore dikgokgono tšeo di lego gona di tla rarollwa mola molao wona o tšwela pele go
phethagatšwa, Lekgotla la Bosetšhaba la Barekiši ba Bjala le ikemišeditše go ya kgorong ya tsheko go
